Innovasjon Noreg får to nye styremedlemmar

– Dei nye styremedlemmane styrkjer styret med omfattande leiarerfaring frå større verksemder og organisasjonar og innsikt i utvikling av næringsmiljø og politiske prosessar, seier styreleiar Ola H. Strand.

Føretaksmøtet valde nytt styre for Innovasjon Noreg i dag.

Monica Mæland er administrerande direktør i Bergen Næringsråd. Ho har lang erfaring som Høgre-politikar, og har vore byrådsleiar i Bergen, næringsminister, kommunal- og moderniseringsminister og justis- og beredskapsminister. Ho er utdanna jurist og har hatt fleire styreverv. Mæland tilfører styret solid erfaring frå politiske prosessar og inngåande kunnskap om samfunnsoppdraget og rolla til Innovasjon Noreg. Mæland blir nestleiar i styret.

Jan Erik Kjerpeseth er frå Førde og bur i Bergen. Han har brei leiarerfaring frå bank, mellom anna som administrerande direktør i Sparebanken Vest og i noverande stilling som konsernsjef i Sparebanken Norge. Kjerpeseth er styreleiar i NRK og har sete i ei rekkje styre, mellom anna i verksemder innan bank og finans. Kjerpeseth kjem til styret med betydeleg kompetanse innan kredittvurdering og kredittformidling frå bank.

Valkomiteen meiner at dei nye styremedlemmane tilfører styret brei leiarerfaring og innsikt i utvikling av næringsmiljø og utfordringane og moglegheitene for bedriftene.

Kristin Misund har vore nestleiar i styret, men går no ut. Det same gjer Kristine Nore. – Eg vil nytte høvet til å takke dei to som avsluttar for deira verdifulle bidrag i Innovasjon Noregs styre over fleire år, seier Strand.

Det nye styret i Innovasjon Noreg består av:

Ola H. Strand, styreleiar

Monica Mæland, nestleiar

Merethe Nygaard Kristiansen

Heine Østby

Kristine Falkgård

Arne Ingebrigtsen

Liv Dingsør

Arvid Gusland

Jan Erik Kjerpeseth