Statssekretær opna festival på historisk grunn

Familiefestivalen Sommar i Borggården vart opna ved portalen til Erkebispegården, rett ved Nidarosdomen, i strålande solskin. Teater Basun og musikar Kriss Stemland sørga for underhaldning og statssekretær Helge Flø Kvamsås heldt ei tale. 

Kvamsås var begeistra over festivalens fokus på handverk, arkeologi og historie; 

• Gjennom fokus på tradisjonshandverk, deltaking og formidling av kulturarven kan vi bidra til istandsetting av vakre kyrkjebygg og til bevaring for framtida. Akkurat slik vi ser her i dag. Eg vil takke NDR for det arbeidet som de gjer for vår felles kulturarv. La oss bruke desse dagane til å kjenne på stoltheit, nysgjerrigheit og fellesskap. Og kanskje – til å legge ein liten stein til i det store byggverket som er vår felles kulturarv.

Dette er sjette gongen Restaureringsverksemda ved Nidaros domkyrkje (NDR) arrangerer Sommar i Borggården i Erkebispegarden. Festivalen byr på ti dagar med opplevingar for både barn og vaksne. Her kan dei besøkande oppleve levende handverk, kreative verkstader, teater, omvisingar og escape rooms – alt med historia og tradisjonshandverket i sentrum.

Oddmund Hoel, direktør ved NDR, håper festivalen kan trigga interesse for historie og handverk; 

•  Dersom vi skal vere i stand til å ta vare på nasjonalmonument som Nidarosdomen og Erkebispegarden for framtida, er det heilt avgjerande at vi også tek vare på tradisjonshandverka. Derfor er det så viktig for NDR å skape interesse og forståing for handverka. Dei er historie i praksis.

I Borggarden fekk statssekretær Helge Flø Kvamsås møte steinhoggarar, smedar og andre handverkarar frå NDR, som til dagleg arbeider med restaureringa av domen. Han fekk og prøve seg som steinhoggar. Deretter gjekk besøket vidare til stillaset på sørsida til Nidarosdomens, kor eit stort restaureringsarbeid går føre seg på grunn av utfordringar med forvitring av stein. Statssekretærens besøk heldt fram med ei omvising inne i Nidarosdomen. I tillegg til opninga av Sommar i Borggården, sto samtaler om nasjonaljubileet i 2030 på agendaen under besøket.

Nasjonaljubileet 2030 markerer at det er 1000 år sidan slaget på Stiklestad. I åra fram mot 2030 blir jubileet markert gjennom ulike tema og aktivitetar rundt omkring i heile landet, som skal auke kunnskapsnivået for kor viktig desse hendingane har vore for landet vårt, for kven vi er og for det samfunnet vi bygde. Regeringa ønskjer at jubileet skal vere eit kunnskapsløft. Nidaros Domkirkes Restaureringsarbeider (NDR) og anlegget her har ein sentral funksjon i å formidle kunnskap og historie i ramma av jubileet, sa Kvamsås.