Statsbudsjettet 2025: Nærare ein halv milliard kroner meir til fylkesvegnettet

– Dette er eit løft for fylkesvegane. Fylkesvegnettet utgjer ein stor del av vegnettet for persontransport og næringsliv over heile landet, og den auka satsinga vil gjera fylkeskommunane betre i stand til å ta vare på det dei har. Dette er ei satsing som vil komma mange til gode, seier samferdselsminister Jon-Ivar Nygård.

–  I Nasjonal transportplan varsla vi ei opptrapping til fylkesveg. Trygge og gode vegar er avgjerande for å sikre busetting og verdiskaping på små og store stader i heile landet. Det er viktig at vi allereie i budsjettet for 2025 gir meir midlar til fylkene for å møte det store behovet, seier kommunal- og distriktsminister Erling Sande.

Auken i budsjettet er i tråd med Nasjonal transportplan for 2025–2036, som legg opp til eit kraftig løft for fylkesveg. Slik fordeler pengane seg i budsjettforslaget frå regjeringa:

• Den største delen av auken går til opprusting og fornying av fylkesvegar i fylkeskommunane sine frie inntekter.
• Regjeringa foreslår å løyva 50 millionar kroner til ei ny øyremerkt tilskotsordning for å rusta opp 14 fylkeskommunale bruer som er kritiske for militær mobilitet. 
  
  

I tillegg til auken på 480,5 millionar kroner er det óg lagt inn auke i desse ordningane i budsjettforslaget:

• Regjeringa legg for 2025 til grunn rentekompensasjon på 4,0 prosent, og rentekompensasjonsordninga for transporttiltak i fylka auker med 74,7 millionar kroner.
• Regjeringa foreslår å løyva 40 millionar kroner til tilskotsordninga til tryggare skulevegar og nærmiljø. Det er ein auke med 16,4 millionar kroner frå inneverande år og inneber at vi allereie i 2025 er oppe på det årlege, gjennomsnittlege nivået som er føresett i Nasjonal transportplan 2025–2036.
  
  

Regjeringa foreslår å avvikle det øyremerkte tilskotet til vedlikehald av fylkesvegar på Samferdselsdepartementets budsjett og overføre pengane til rammetilskotet til fylkeskommunane. Fordelinga mellom fylkeskommunane vert den same, men endringa reduserer administrative kostnadar både for fylkeskommunane og staten. Auken i midlar til fylkeskommunane kjem i tillegg til denne endringa.

Fylkeskommunane finansierer i hovudsak fylkesvegane med sine frie inntekter. I 2023 brukte fylkeskommunane om lag 24,4 milliardar kroner til drift, vedlikehald og investering i fylkesveg.

For andre pressemeldingar frå samferdselsbudsjettet 2025 – sjå:

• Fleire saker frå departementet