Tar i bruk rundkøyring på E39 i Veibustkrysset onsdag morgon

- Arbeidet har så langt gått etter planen. Vår entreprenøren, Busengdal AS, har plassert mykje kortreist stein frå Kongshaugstranda kloakkrenseanlegg, for å bygge  omkøyringsveg langs E39. Dette kjem til nytte i neste fase til våren, seier byggeleiar Ingar Walbø i Statens vegvesen.

Trafikken gjennom Veibustkrysset på E39 inn mot Ålesund frå sør vil gå som skissa over viser fram til månadsskiftet april/mai. Då vil det bli ei ny endring i køyremønsteret.

Hovudentreprisen i Veibustkrysset starta opp i byrjinga av november, og med ein mild desember såg entreprenøren ein moglegheit til å etablere rundkøyringa allereie no før jul.

- Det er mykje anleggstrafikk i området no, og ein rundkøyring vil betre trafikktryggleiken i anleggsfasen for alle trafikantar, seier Walbø.

På nyåret skal entreprenøren starte med å sprenge ut fjell sør for E39, for å gjere plass til nye av- og påkøyringsramper på E39 og bygge opp ny omkøyringsveg på sørsida av eksisterande veg.

-Vi oppfordrer folk til å vere merksam på endra køyremønster og sette ned farten, minner Walbø om.