Nye avtalar med private aktørar for å redusere ventetidene

Helse Vest har avtalar med fleire private og ideelle aktørar for å gjennomføre ulike behandlingar og prosedyrar. Mellom anna inkluderer dette: 

• Helse Stavanger: brystreduksjon, bukplastikk og åreknuteoperasjonar 

• Helse Førde: koloskopi og gastroskopi 

• Helse Bergen: nasekirurgi, fjerning av mandlar og skjoldbruskkirurgi 

• Helse Fonna: koloskopi, gastroskopi og nevrologiutgreiing 

 
Oversikt over inngåtte avtalar 

Helseføretak	Behandling	Tal prosedyrar	Avtaleperiode
Helse Førde	Koloskopi	400	01.12.2024 - 31.05.2025
Helse Bergen	Nesekirurgi	300	02.01.2025 - 30.06.2025
Helse Bergen	Fjerning av mandlar	600	01.10.2024 - 28.02.2025, ny opsjon 01.03.2024 - 28.02.2026
Helse Bergen	Behandling av hudkreft	200	01.03.2025 - 31.08.2025
Helse Bergen	Hemoroider	150	01.03.2025 - 31.08.2025
Helse Fonna	Koloskopi	150	01.12.2024 - 31.05.2025
Helse Fonna	Gastroskopi	100	01.12.2024 - 31.05.2025
Helse Fonna	Nevrologiutredning	100	02.01.2025 - 30.06.2025
Helse Stavanger	Brystreduksjon	60	01.11.2024 - 30.04.2025
Helse Stavanger	Bukplastikk	40	01.11.2024 - 30.04.2025
Helse Stavanger	Åreknuteoperasjonar	100	01.11.2024 - 30.04.2025

Forbedra rutinar for samarbeid  

Gjennom hausten 2024 har Helse Vest etablert gode rutinar for samarbeid mellom helseføretaka og dei private aktørane. Dette skal bidra til å redusere ventetidene, i tråd med regjeringas Ventetidsløfte. Dei nye rutinane inneberer at helseføretaka beskriv kva fagfelt og prosedyrar dei har ønske om avlastning for, og at det gjennomførast raske anskaffingsprosessar.  
 
– Når avtalane er inngått kan pasientar overførast frå helseføretaka sine ventelister til dei private aktørane. Både helseføretaka og dei private aktørane har gitt gode tilbakemeldingar på desse avtalane, seier Bjørn Egil Vikse, fagdirektør i Helse Vest RHF.  

Vil kjøpe meir frå dei private  

Helse Vest har planar om å kjøpe fleire teneste frå dei private, for å få ned ventetidene. Det gjeld behandlingar som ekkokardiografi, hudbehandlingar, hemoroidekirurgi, behandling av hudkreft og behandling av krokfinger.   

I budsjettet for 2025 er det sett av 50 millionar kroner til kjøp frå private aktørar i 2025, som ein del av Ventetidsløftet.  

Helse Vest vil halde fram dialogen med helseføretaka for ytterlegare kjøp, basert på innmeldt kapasitet frå dei private aktørane og behovet til helseføretaka.