Sparebanken Møre og Innovasjon Noreg sikrar 100 millionar til vekstbedrifter i fylket

Vekstgarantiordninga er til for innovative, små og mellomstore bedrifter som veks raskt, men har vanskar med å stille tryggleik for finansiering. Gjennom avtalen garanterer Innovasjon Noreg for 75 prosent av tapa banken får viss bedrifta ikkje kan oppfylle sine forpliktingar. Lånet kan vere på inntil åtte millionar kroner per bedrift.

Innovasjon Norges vekstgaranti er resultatet av eit samarbeid med Det europeiske investeringsfondet (EIF), som igjen er ein del av EUs ordning InvestEU.

Fyller klart behov hos bedriftene

- Gjennom samarbeidet med Sparebanken Møre får fleire bedrifter i fylket auka tilgang til kapital for å vekse og drive innovasjon. Vi ser at mange verksemder slit med å finne investorar som er villige til å ta risiko i ein fase då bedriftene veks mykje og har lite dei kan stille som tryggleik. Difor er vi spesielt glade for å kunne tilby vekstgaranti saman med Sparebanken Møre. Den fyller eit veldig klart behov, seier Helge Gjerde, direktør i Innovasjon Noreg Møre og Romsdal.

Terje Krøvel, leiar for næringslivsmarknad i Sparebanken Møre, seier at banken har god erfaring med vekstgarantiordninga. - Vi har vore med frå starten, og er veldig fornøgde med å få på plass ein ny samarbeidsavtale med Innovasjon Noreg. Avtalen gir oss ein betre moglegheit til å bidra med vekstkapital til raskt veksande og innovative bedrifter i vårt nedslagsfelt.

Allereie i gang

Sparebanken Møre er allereie i gang med å signere finansieringsavtalar gjennom den nye vekstgarantiordninga. Ei av bedriftene er Effee AS, som spesialiserer seg på robotiserte løysingar for reparasjon til industrikundar. Dei hjelper kundane med å reparere utstyr i staden for å erstatte det, og eliminerer manuelt arbeid som gir utfordringar med tryggleiken.

Bakgrunn

Vekstgarantiordninga er resultatet av eit samarbeid med Det europeiske investeringsfondet (EIF). Målet er å bidra til entreprenørskap, vekst, innovasjon, forsking og utvikling, grøn og digital omstilling og sysselsetjing. Ordninga nyttar private og offentlege midlar til støtte for ei berekraftig utvikling. Innovasjon Noreg inngjekk eit nytt samarbeid med EIF i 2024 og har lansert ei betydeleg satsing på ordninga.