Millionpris for handtering av farleg avfall

Møter kompetansebehovet i framtida innan avfall og gjenvinning

HK-dir delar årleg ut Utdanningskvalitetsprisen for høgare yrkesfagleg utdanning. Prisen skal påskjøne framifrå arbeid med utdanningskvalitet i norsk høgare yrkesfagleg utdanning, og stimulere institusjonane til systematisk arbeid med å vidareutvikle kvaliteten på utdanningane sine. I år går prisen til Vestfold og Telemark Fagskole for arbeidet sitt med eit spesialtilpassa utdanning innan handtering av farleg avfall.

–  Utdanningskvalitetsprisen løftar fram institusjonar som viser framifrå arbeid med utdanningskvalitet, og prosjektet frå Vestfold og Telemark Fagskole er eit strålande døme. Gjennom tett samarbeid med bransjen har dei skapt eit studieprogram med høg utdanningskvalitet som treffer på kompetansebehov i arbeidslivet og styrkjer evna sektoren har til å ta samfunnsansvaret sitt, seier Sveinung Skule, direktør i HK-dir.

Utdanninga er den einaste av slaget sitt i Noreg og er utforma for ei mangfaldig studentgruppe, med ulike utdanningsbakgrunnar og praktisk erfaring. Utdanninga svarer på konkrete behov i arbeidslivet og  bidreg til at avfalls- og gjenvinningssektoren kan ta samfunnsansvaret sitt på ein effektiv måte.

Skule gratulerer vinnarane i år: – Eg håpar dette vil inspirere fleire til nytenking og samarbeid i utvikling av studietilbod. Gratulerer så mykje med ein velfortent pris, avsluttar Skule.

Eit unikt og vedvarande samarbeid med bransjen

– Det å vinne utdanningskvalitetsprisen heng høgt, og vi er stolte av erkjenninga av det gode samarbeidet vårt med bransjeorganisasjonane. Eg trur at dette prosjektet beskriv viktige sider av eigenarten til fagskulane og korleis vi skal jobbe, seier Pål Kyrkjebø, prosjektleiar og avdelingsleiar ved Fagskolen Vestfold og Telemark.

I tett samarbeidde med bransjeorganisasjonen Norsk foreining farleg avfall (NFFA) har fagskulen utvikla Noregs første formelle utdanning innan handtering av farleg avfall og miljøgifter. Samarbeidet har halde fram og er no sett i system. Det gode partnarskapet har resultert i ei spesialisert utdanning og fem bransjeprogram som har som mål å auke kompetanseutviklinga i sektoren.

Kyrkjebø meiner prisen stadfestar posisjonen til skulen som ein truverdig kompetanseaktør og styrkjer omdømmet deira i framtidige prosjekt for kompetanseutvikling.

– Evna til raskt å kunne drive kunnskapsoverføring krev ei symbiotisk samarbeidsform med aktørane i bransjane. I slike høgt spesialiserte utdanningstilbod må fagskulane bidra med den pedagogiske styrken sin, strukturering av læringsarbeidet, og kvalitetssikring av utdanninga, medan teknologien og kompetansen hovudsakleg blir utvikla av bransjen sjølv, forklarer Kyrkjebø

Eit skreddarsydd utdanningstilbod

Prosjektet "Sammen om å komme kompetansebehovet i møte i avfalls- og gjenvinningsbransjen: Handtering av farleg avfall og miljøgifter" er spesielt tilpassa behova i bransjen. Med ein hybrid modell som kombinerer digital og fysisk undervisning er den også tilgjengeleg for studentane, som ofte jobbar i bransjen. Gjennom eit nært og varig samarbeid med bransjen, sikrar fagskulen at opplæringa held fram med å vere relevant og yrkesretta.

– Prosjektet imponerer med den innovative hybridlæringsmodellen sin. På ein presis og praksisnær måte møter dei kompetansebehovet i avfalls- og gjenvinningsbransjen. Samarbeidet mellom studentar, undervisarar og næringslivet sikrar høg relevans og motiverer til læring. Dette er ein velfortent vinnar av Utdanningskvalitetsprisen for Høgare Yrkesfaglig Utdanning 2024," seier juryleiar Ole Dibbern Andersen.

Fakta:

For å kunne ta imot prisen må tiltaket oppfylle følgande kriterier:
Tiltaket:

• bidrar til oppdatert og yrkesretta høgare yrkesfagleg utdanning;
• bidrar vesentleg til utvikling og betring av studentane sitt læringsutbytte;
• vert gjennomført i eit aktivt samarbeid mellom studentar, tilsette og arbeidsliv;
• er velorganisert og basert på systematisk innhenta informasjon;
• har overføringsverdi til annan høgare yrkesfagleg utdanning.

Tilskotsbeløp er 1 000 000 kroner.