Feira framsteg innan blodkreft, demensforsking og barnehelse

Forskingsprisen, prisen til ung forskar og innovasjonsprisen blei delt ut på forskingskonferansen i Helse Vest 31. oktober. Førstnemnde gjekk til Bjørn Tore Gjertsen, som er overlege ved Haukeland universitetssjukehus og professor ved Institutt for Klinisk medisin ved Universitetet i Bergen. Torsdag blei han tildelt forskingsprisen i Helse Vest for den viktige forskinga si på blodkreft, spesielt akutt myeloid leukemi (AML).

Gjertsen sitt arbeid har ført til betre behandling av AML-pasientar gjennom avanserte analysar av enkeltceller og signalvegar. Dette har forbetra både diagnostikk og behandling.

– Han har klart å kombinere grunnforsking med praktisk behandling. Arbeidet hans har forbetra behandlinga for pasientar med akutt myeloid leukemi og har vært banebrytande, seier professor Inger Thune, som er leiar for priskomiteen for forskingsprisen og prisen for ung forskar.

Overlegen og professoren har også bygd opp eit sterkt forskingsmiljø og eit breitt samarbeid mellom grunnforskarar og klinikarar. Dette samarbeidet har vore viktig for framstega innan leukemibehandling. 

Ny kunnskap om Alzheimers, demens og aldring

Ung forskar-prisen gjekk til Miguel German Borda, postdoktor og geriatar ved Stavanger universitetssjukehus og Universitetet i Stavanger, for forskinga hans på Alzheimers sjukdom, demens med Lewylekam og aldring. Dette er ein samarbeidspris med midlar frå Universitetet i Bergen, Universitetet i Stavanger, Høgskulen på Vestlandet og Helse Vest.

– Miguel har kombinert grunnforsking med kliniske studiar på ein imponerande måte utgåande frå eit sterk forskingsmiljø i Stavanger. Hans arbeid gir oss ny innsikt i korleis vi kan førebygge og behandle nevrodegenerative sjukdommar betre, seier professor Thune.

Forskinga til Borda har vist at dårleg ernæring og redusert muskelfunksjon kan påverke både daglege gjeremål og kognitiv evne hos pasientar med nevrodegenerative lidingar. Han har også funne ein samanheng mellom systemisk inflammasjon og demens.

Betre tilbod til barn og unge

Innovasjonsprisen i Helse Vest gjekk til eit prosjekt som omhandlar ei svært viktig pasientgruppe. "Barn og unges helseteneste" sikrar at barn og unge får tidleg hjelp og på lågast mogleg nivå. Dette bidreg til betre pasientbehandling.

Prisvinnarane er Ester Marie Espeset, prosjektleiar og psykologspesialist, og Ingrid Øritsland Våge, innovasjonsrådgivar, begge frå Helse Fonna. Dei jobbar for å forbetre samhandlinga mellom kommune og spesialisthelseteneste i psykisk helsearbeid. Prosjektet involverer fleire tenester som helsestasjon, fastlege, barnevern, PP-tenesta og BUP, og gir ei oversikt over rollene og ansvara til dei ulike tenestene. Dette gjer det lettare for både brukarar og tilsette å vite kvar dei skal gå for hjelp.

Prosjektet har fått stor merksemd nasjonalt og er spreidd til fleire regionar. Det har også fått støtte frå InnoMed. Gjennom sju samhandlingsforløp for dei vanlegaste psykiske helseplagene hos barn og unge, som angst, autismespekterforstyrringar og depresjon, sikrar prosjektet at hjelpa er tilpassa behovet til den enkelte. Dette heilskaplege tilbodet gir barn og unge betre høve til å meistre utfordringane sine og få den støtta dei treng.