Vossabia vinn Vestlandspris!

- Det er ei stor glede å kunne gi Bedriftsutviklingsprisen i landbruket i Vestland fylke til Renate Lunde og Vossabia AS, ei innovativ bedrift med utspring fra gården på Bulken ved Voss. Å kombinere gardsliv med produksjon av hud- og hårpleieprodukter er eit glitrande eksempel på kva som er mogleg om ein tenkjer kreativt. Dei har verkeleg gjort seg fortjent til prisen, seier Aslak Sverdrup, regiondirektør i Innovasjon Noreg Vestland. 

Den ferske prisvinnaren er stolt over anerkjenninga: 

- Det er ei stor ære for meg og heile Vossabia-teamet å vinne BU-prisen for Vestland. Å få slik anerkjenning for over 20 år med hardt arbeid rører meg djupt, og eg er uendeleg takksam. Eg håpar denne prisen bidreg til at endå fleire oppdagar Vossabias bodskap, og blir inspirerte til å sjå verdien i å kombinere gardens ressursar med fokus på helse, berekraft og naturmangfald, seier ein stolt Renate Lunde i Vossabia. 

Med Vossabia på huda

Renate Lunde driv og eig garden på Bulken ved Voss. Garden og ressursane der er sjølve kjerna i Vossabia. Med sine hud- og hårpleieprodukt, omvisningar, utstrekt formidlingsaktivitet med føredrag, kurs og opplevingar på garden jobbar Lunde med å auke bevisstheita rundt ressursar som finst på ein gard og naturen rundt: 

- For meg gikk det sport i å kartlegge gardens ressursar då eg overtok for 25 år sidan, og heile tida prøve å sjå verdi og moglegheiter i det dei fleste av oss tek for gitt. Dette brenn eg framleis for og ser enormt potensial i å nytte stadig meir av det ein gard har å by på, fortel Lunde.  

Vossabia nyttar lokale, økologiske råvarer som honning, bivoks og ville urter i hudpleieprodukta sine som sikrar høg kvalitet og berekraft. Ved å lage verksame produkt av det andre bønder kallar ugras, har Renate blitt ein pioner innan naturleg kosmetikk. Men nokre utfordringar har det vore: 

- Då eg vart sjuk i starten av tjueåra, fekk det meg til å bli bevisst på førebyggjande helse og naturlege ingrediansar, både i mat og kosmetikk. Biene opna auga mine for garden sitt biologiske mangfald, og då mamma vart kreftsjuk gav det meg ein kraftig dytt til å skape dei produkta eg sjølv sakna, fortel prisvinnaren. 

Ny driftsbygning 

Med god marknadsføring og gode produkt har Renate nådd ut til over 100.000 kundar og 120 forhandlarar i heile landet og med det fått ei imponerande vekst med sunn økonomi og resultat for den innovative gardsbedrifta.   

No planlegg Lunde ein ny stor driftsbygning på tomta, og vil føre tunet tilbake til slik det såg ut ein gong, men med moderne drift basert på gardens ressursar.  

Om BU-prisen 

Innovasjon Norge deler kvart år ut prisen Bedriftsutviklingsprisen (BU-prisen) i landbruket på oppdrag frå Landbruks- og matdepartementet. BU-prisen er ein bedrifts- og næringsutviklingspris for dei som har etablert ei vellukka bedrift eller næring med basis i ressursane i landbruket eller i bygda.  

Kandidatane vert vurdert etter kriteria berekraft og innovasjon/nyskaping i landbruket. 

Det vert kåra ein vinnar i kvart fylke som får 50 000 kroner og dei fylkesvise vinnarane deltek så i den nasjonale konkurransen om 250 000 kroner.