Det første rådgjevande Bionova-styret er klart

- Vi er glade for at det første porteføljestyret for Bionova no er oppnemnd. Det vil gjere Bionovas arbeid meir effektivt og hjelpe oss gjere norsk skog-, hav-, og landbruk grønare, seier Håkon Haugli, administrerande direktør i Innovasjon Noreg.

Bionova er eit sentralt oppdrag for Innovasjon Noreg, og skal vere eit verktøy som bidrar til å nå Noregs klimamål for 2030 og til å bli eit lavutsleppssamfunn i 2050. Bionova skal samtidig bidra til innovasjon og verdiskaping innan bioøkonomien knytta til jordbruk-, skogbruk- og havbruksnæringane.

- Det nye porteføljestyret vil hjelpe oss å få viktige signal rundt den vidare utviklinga av Bionovas ordningar for blå og grøne næringar, seier Haugli.

Ein prioritet for regjeringa

Mat- og landbruksminister Geir Pollestad er glad for at Bionova no har fått på plass eit rådgjevande styre:

- For regjeringa er Bionova er eit prioritert verktøy for klimatiltak i jordbruket og for auka verdiskaping gjennom ein meir sirkulær bioøkonomi. Innovasjon Norge har no fått på plass eit rådgjevande styre med ein variert og spennande bakgrunn som vil styrkje Bionova sitt arbeid framover, seier han.

Han får støtte frå næringsminister Jan Christian Vestre, som ser fram til å følgje den vidare utviklinga av Bionova:

- Det er eit stort potensial for auka verdiskaping i biobaserte næringar gjennom ein marknadsbasert, berekraftig og sirkulær utnytting av fornybare biologiske ressursar. Eg er oppteken av at Bionovas verkemiddel samverkar godt med andre virkemiddel i Innovasjon Noreg og resten av det næringsretta verkemiddelapparatet. Eg ser fram til å følgje arbeidet framover, seier han.

Variert bakgrunn og kompetanse

Representantane i det nyleg oppnemnde styret har ein variert bakgrunn, og kjem frå både grøn og blå sektor. Leiaren for porteføljestyret vil vere Kristine Falkgård, som er direktør for berekraft i Fremtind Forsikring AS, og som også er representant i Innovasjon Noregs styre. Ho gler seg til å ta fatt på vervet:

- Bionæringas rolle i å vere med å gjere Noreg til eit lavutsleppssamfunn er betydeleg. I utviklinga av grøne vekstnæringar, for karbonopptak og lagring og for etablering av ein sirkulær bioøkonomi er det viktig at verkemiddelaktørane og bionæringa har eit tett samarbeid, seier Falkegård.

- Etableringa av Bionova er nettopp eit slikt verktøy for samhandling, og gjennom etableringa av eit bredt samansatt porteføljestyre som ein strategisk referansegruppe skal nye verdikjedar innan land-, skog-, og havbruk bidra til at Noreg når sine klimamål, seier Falkegård.

Dei øvrige som sit i det nye porteføljestyret er:

Namn	Organisasjon	Type
Sigrid Hjørnegård	Norges bondelag	Representant
Anton Langeland	Norsk Bonde- og småbrukarlag	Representant
Hans Asbjørn K. Sørlie	Norges Skogeierforbund	Representant
Marit Bærøe	Sjømat Norge	Representant
Anne Marit Post-Melbye	Miljøstiftelsen Zero	Representant
Thomas Cottis	Naturvernforbundet	Representant
Per Stålnacke	NIBIO	Representant
Ana Karina Caravajal	SINTEF Ocean AS	Representant
Renate Larsen	Oceanfood AS	Representant
Kristin Orlund	Landbruks- og matdepartementet	Observatør
Ole Martin Steien	Nærings- og fiskeridepartementet	Observatør