Melder hærverk på trafikklys til politiet: – Kan gje trafikkfarlege situasjonar

Det var midt på natta sundag 12. desember, meir bestemt klokka 03:16, at kabelen til sjølve lyset vart klipt av.

Kabelen er i utgangspunktet dekt med ein stålfiber som er surra rundt kabelen. Denne var tvinna vekk, og kabelen var klipt.

I tillegg hadde fleire refleksmarkørar vorte kasta vekk frå vegen.

– Kan bli trafikkfarleg

– Me ser svært alvorleg på saka. Hærverk som dette kan gje trafikkfarlege situasjonar, seier byggjeleiar Kristian Slinde i Statens vegvesen.

Me legg ned mykje ressursar for at tryggleiken skal varetakast for trafikantene medan me gjer vegarbeid, og for at trafikkflyten skal bli best mogleg.

– Då er det synd at me i tillegg må bruka tid på å ordna opp etter hærverk.

Entreprenøren var ute på anlegget sundag og retta opp i skadane.

Meldt til politiet

– Hærverket er meldt til politiet, understrekar Slinde.

Dersom nokon har tips i høve saka kan ein kontakte politiet (tlf. 02800), Sogndal politistasjon (tlf. 400 39 280) eller Vik politistasjon (tlf. 57 69 80 80).

Prosjektet

Bondeviki - Fardal ligg på riksveg 13 mellom Sogndal og Leikanger.

Anleggsarbeidet starta i september, og skal vera ferdig sommaren 2023.

Fosse Maskin og Transport AS frå Vik er entreprenør på prosjektet, etter å ha levert eit tilbod på dryge 60 millionar pluss moms.

Vegstykket vert gjennomsnittleg trafikkert av 2737 køyretøy per døgn. Ni prosent, eller om lag 270, av desse er lange køyretøy.

Les meir om prosjektet her.