Rv. 555 Sotrasambandet: Tre leverandørar er kvalifisert til å levere tilbod på lokale støytiltak

Leverandørane som er kvalifiserte er

• Åsane Byggmesterforretning AS
• Bergan bygg AS
• TH BHAS BYGG

Kontrakten dei konkurrerer om er utforma som ei fireårig rammeavtale med opsjon på forlenging. Etter tilbodsfristen 12. februar startar forhandlingar, før kontrakt vert tildelt i april. Inntil tre leverandørar kan tildelast kontrakten, og dei vil deretter konkurrere på oppdrag gjennom eigne avrop innanfor rammeavtala.

Signering i april 2021

Byggeleiar i Statens vegvesen Birger Ræmisch Matthiessen seier dei er godt i rute for signering i april neste år.

- Kvalifiseringa gjekk veldig bra, og vi er glade for å ha med oss alle dei tre interesserte leverandørane vidare til tilbodslevering i februar, med etterfølgjande forhandlingar.

Matthiessen satsar på kontraktsignering til våren, og at arbeidet kjem i gong raskast mogleg.

- Planen vår er å tildele kontrakten i løpet av april 2021, og dei første arbeida kan setje i gang i løpet av sommaren. Kontraktsmodellen som er vald gjer arbeidet føreseieleg for Statens vegvesen i gjennomføringa. Samstundes er vi sikra konkurranse på kvalitet og pris gjennom avrop på rammeavtala.

Om støytiltaka

Det skal gjerast støytiltak på i underkant av 300 bustader på strekninga frå Loddefjord i Bergen vest til Kolltveit i Øygarden. Bustadene som har fått innvilga støytiltak ligg langs traseen til ny riksveg 555.

Arbeidet med støytiltak vert starta opp før signering av OPS-kontrakten for nytt Sotrasamband. Det er mange bustader som skal ha støytiltak og arbeidet vil difor òg gå parallelt med gjennomføringa av OPS-kontrakten, som etter planen har oppstart hausten 2021.