Universitetet i Oslo med ny storsatsing innan demokratiforsking

– I vår komplekse og skiftande verd er det viktigare enn nokon gong å ha ei djup forståing for kva demokrati betyr, korleis vi kan styrke det og forstå det, seier rektor ved Universitetet i Oslo, Svein Stølen.

Når Universitet i Oslo no startar sitt største initiativ innan demokratiforsking nokon sinne, er målet å utforske demokratiet breitt forstått.

– UiO:Demokrati skal bidra til å auke vår forståing av demokratiet, og i samspel med andre ruste det i møte med utfordringane som kjem. Ambisjonane er kort sagt store, seier direktør for UiO:Demokrati, Tore Rem.

Dei siste åra har forsking vist at demokratiet som styreform er på vikande front, og at autoritære krefter ser ut til å vinne terreng. Talet på folk som uttrykker misnøye med demokratiet aukar på verdsbasis, krigen i Ukraina minner oss om kva verdiar som står på spel og den kanskje største utfordringa – klimakrisa, står uløyst framfor oss.

– Vi treng samarbeid for å løyse desse komplekse problema. Vi treng samfunnsvitarar og humanistar, vi treng juristar, teologar, medisinarar og informatikarar – for å nemne nokon. I beste demokratiske ånd treng vi alle på dekk, seier Rem.

Velkommen til lansering

Den 14. mars er rektor Svein Stølen, direktør Tore Rem og fleire av landets leiande demokratiforskarar samla på arrangementet «Kva skjer med demokratiet?» i Domus Bibliotheca ved Universitetsplassen. Dit kjem også fribyforfattar Fatemeh Ekhtesari, for å lese frå boka "Hun er ikke kvinne". I tillegg blir det panelsamtale om demokratiets tilstand mellom Jette Christensen, Shazia Majid, Gina Gylver og Carl Henrik Knutsen – denne er leia av Ole Torp.

Her er lenke til UiO:Demokrati

Her er lenke til grunnlagsdokumentet vårt

Her finn du meir informasjon om dei fire første forskargruppene