Norec-partnar Julia Mwashi (42) omkom i Ethiopian Airlines-styrten

I kveld har vi fått melding om at Julia Mwashi (42), utvekslingskoordinator for partnaren vår Kenyan Girl Guides Association, er blant dei omkomne i Ethiopian Air-styrten sundag.  

Julia var på veg heim til Kenya frå Norge. Her deltok ho på Youth Summit, eit vekeslangt nettverksmøte og partnarkurs arrangert av Norec. Der deltok ho aktivt saman med om lag 120 andre Norec-partnarar. 

-       Vi vil hugse Julia som eit høgt respektert medlem av partnarskapet. Ho var konstruktiv, og brukte erfaringa si til å betre utvekslingsprosjektet, seier Kari Lindemann, programrådgjevar i Norec for Yess Girls-utvekslinga. 

Yess Girls er eit utvekslingsprosjekt som består av jentespeiderforeningar frå ulike afrikanske og asiatiske land. Målet med prosjektet er å styrke og bygge opp unge kvinner, slik at dei kan bli endringsagentar og leiarar i sitt lokalmiljø. Norec har fasilitert prosjektet i fem år, og har eit nært og godt forhold til partnarane.  

-       Det var ein tung beskjed å få. Julia var ein mentor for fleire unge kvinner, og har satt djupe spor både hos dei og i prosjektet. Vi er utruleg lei oss, og kondolerer så mykje til alle som sto ho nær, seier direktør Jan Olav Baarøy. 

Partnarmøtet i Norge var Julias siste oppdrag som utvekslingskoordinator i Norec-prosjektet. Ho ville blitt 43 år 19. mars. Ho etterlet seg to born.