Norec lanserer ny rapport: Slik fører utveksling til læring

Det er blant funna i metastudien "Kva veit vi om utveksling for utvikling?", utført på oppdrag frå Norsk senter for utvekslingssamarbeid (Norec).

Rapporten er ført i pennen av britiske Cliff Allum, ein av verdas leiande forskarar på feltet internasjonal utsending av frivillige. Han har gjennomgått alle evalueringar, undersøkingar og rapportar som er gjort av Fredskorpset sidan 2002. 

– Det er mykje som må vere på plass for at ei bedrift eller ein organisasjon skal lukkast med utveksling som metode for læring og utvikling. Funna i denne rapporten legg grunnlaget for noko av det vi skal jobbe vidare med som kompetansesenter, seier direktør i Norec, Jan Olav Baarøy.

Integrering på og utanfor arbeidsplassen viktig

Rapporten viser mellom anna at dei organisasjonane som legg best til rette for læring gjennom utveksling har visse fellestrekk: Gode rutiner for utvekslinga, deltakarar som passar til oppgåvene, god samarbeidsevne, samt leiarar med like verdiar og eigerskap i prosjektet.

I tillegg viser studien at organisasjonar som utvekslar deltakarar mellom land i sør lærer mest av kvarandre. I Noreg er læringsutbyte knytt til korleis organisasjonen klarer å ta imot og integrere deltakarane, også utanfor arbeidsplassen. 

Vidare finn Allum at organisasjonane som tilpassar og betrar korleis dei rekrutterer deltakarar, samt organisasjonar som rekrutterer internt, lærer mest. 

Første som kompetansesenter

– Publikasjonen er den første av fleire vi vil komme med som kompetansesenter for utvekslingssamarbeid, seier Helge Espe, seniorrådgjevar og ansvarleg for analyse og evalueringar i Norec.

Rapporten lanserast formelt torsdag 7. februar under eit lunsjmøte hos Norec i Førde, men kan lastast ned og lesast her allereie no.