Europavisjonar inviterer publikum til å synge med

SYNG MED: EUROPAVISJONAR
22. SEPTEMBER KL. 19.00
PÅ HOVUDSCENEN

Europavisjonar er lagt opp som ein finale i Eurovision, men her er det statsleiarar og andre viktige menn og kvinner i verdspolitikken som framfører Eurovision-songane med nye tekstar om politiske visjonar. Merkel vil sleppe flyktningane inn, Putin skuldar situasjonen i Europa på USA (U-U-U-U-USA!) og no er alle opptekne av å ruste opp - da blir ein song om å bade badstu til ein song om å skaffe vapen. 

Før framsyninga vil publikum bli inviterte til å varme opp stemmebanda i foajeen, og under framsyningar står alle tekstane på skjermar. 

Fleire av Europavisjonar sine songar er allereie ute i Europavisjonar-versjon, og det finn du her.

Hardtslåande og aktuell underhaldning

Simen Formo Hay, Johan Hveem Maurud og Oda Radoor står bak suksessframsyninga Europavisjonar, som hadde premiere våren 2025 og har gått for fulle hus sidan. Det er ei vill, leiken og skarp musikktevling mellom Europas statsleiarar frå murens fall og fram til i dag. I ei forrykande førsteakt står spektakulære sceneshow i kø for å overtyde publikum om kven som har den beste visjonen for Europa. Høgdepunkt frå europeisk politisk og økonomisk historie knivar om førsteplassen i dette originale kappløpet om publikums gunst. Og det er publikum som avgjer kva for visjon som skal vinne. 

I Europavisjonar er blodig alvor blanda med vindmaskiner, scenerøyk og paljettar. Det er koreograferte nummer i ulike sjangrar; rock, ballade, disko og pop med songtekstar som tar opp alt frå innføringa av euroen og krigen på Balkan til fredsmekling i Oslo. Eit samla kritikarkorps gav full pott etter premieren, og no kan altså publikum sjølve få bli del av galskapen.