Trine Skei Grande ny styreleiar ved Det Norske Teatret

Det Norske Teatret hadde eit svært sterkt 2025 og kunne notere 209 803 besøkande (opp frå 171 247 i 2024) og eit årsresultat på 17,7 mill. kr; årsresultat før skatt 18,8 mill. kr (12,6 mill. kr for 2024).

I 2024 utarbeidde teateret ein toårig handlingsplan for ein sunnare teaterøkonomi. Styret er tilfreds med at planen no er fullført. Kostnadskutt særleg på personalkostnader og drift har styrkt likviditeten utan å senke dei kunstnarlege ambisjonane. I 2025 blei dessutan rammetilskotet styrkt med 15 mill. kr etter langsiktig arbeid gjennom kampanjen «Tett gapet».  

Teatret har store investeringsbehov framover. Bygget er 40 år og kritiske scenetekniske installasjonar nærmar seg levetid. Arbeidet mot styresmaktene for å sikre teateret som nasjonalt kulturbygg er høgt prioritert. 

Trine Skei Grande ny styreleiar

Styreleiar Hilde Barstad gir seg etter generalforsamlinga og takka møtelyden for fire givande år.
-I denne perioden har teateret vore gjennom ein økonomisk snuoperasjon og eit teatersjefbytte. Åra har vore fylte med krevjande og givande arbeid. Det har vore eit tilfredsstillande verv, der også mange viktige kunstnarlege sigrar og stor oppslutning kring arbeidet ved Det Norske Teatret har vore engasjerande, seier Hilde Barstad.
Ho ønskte samstundes den påtroppande styreleiaren Trine Skei Grande lukke til i den kommande rolla. Den tidlegare Venstre-politikaren og kultur- og inkluderingsministeren (2018-2020) tek fatt på oppgåva med stor entusiasme. 

-Eg meiner at Det Norske Teatret er det mest spennande teateret vi har. Eg håpar å kunna bidra til at det framleis blir ein scene som er nyskapande og brei. Som får fram det beste i eit unikt kunstnarleg ensemble og som set dagsorden og tek vare på historie og språk, seier påtroppande styreleiar Trine Skei Grande som frå 1. april 2024 er administrerande direktør i Forleggerforeningen. 

Høge publikumstal i 2025

Eit høgt besøkstal i 2025 vitnar om at ulike sjanger- og repertoarval har vore kloke. Det er særleg Europavisjonar (96 % besøk, 47 % av billettinntektene) og Da vi var yngre som peikar seg ut som dei store publikumsvinnarane.  

- Det Norske Teatret ønskjer å markere seg som eit internasjonalt teater i toppklasse, gjennom ei radikal satsing på mangfald og fleirstemmigheit både i ensemble, kunstnarlege team og i val av prosjekt. Særleg viktig har residensen til Tani Dibasey og Only Slime på Scene 3 gjennom heile 2025 vore, samt samarbeidet med dramatikaren Linda Gathu om framsyninga Sukker, som vart heidra med Ibsenprisen, seier teatersjef Kjersti Horn om sitt første år i sjefsstolen.  

- Store publikumssuksessar har vore storsatsinga Europavisjonar på hovudscenen, samt Da vi var yngre av Oliver Lovrenski på Scene 2 – begge djervt satsa prosjekt som gjekk rett inn i samtida og opna teateret for mange nye publikummarar. Ein stor kunstnarleg siger var framsyninga Vinter på hovudscenen, i regi av stjerneskotet Lisaboa Houbrechts, som opna Fossefestivalen i september. Årets festival vekte stor internasjonal merksemd og la grunnlaget for sterke internasjonale samarbeid i åra framover, seier Kjersti Horn.

Nødvendig vedlikehald

Andreas Flåt Aglen er for tida konstituert som direktør for Det Norske Teatret. 

2025 var eit godt år for Det Norske Teatret. Resultatet stadfestar ein vel gjennomført snuoperasjon og god oppnåing av sentrale økonomiske mål.  Verksemda planlegg å auke investeringsnivået vidare i 2026 og i åra framover for å møte dei auka krava knytte til oppgraderingar og nødvendig vedlikehald, seier Andreas Flåt Aglen. 

Styret 

Etter val på årsmøtet har styret konstituert seg med denne samansetjinga: Trine Skei Grande (styreleiar), Erik Bolstad (nestleiar), Loveleen Rihel Brenna, Martin Alexander Korsvik Revheim, Magni Hjertenes Flyum, Heidi Gjermundsen Broch og Lone Nordløkken. 

Les årsmeldinga for 2025.