Teatermaraton om den vestlege sivilisasjonens fødsel

ANTROPOLIS
av Roland Schimmelpfennig
NORDENPREMIERE LAURDAG 25. APRIL KL. 13.00 - ca. 20.00
SCENE 2

Ein serie i fem delar om byen Tebens oppsving og fall, regissert av tysk-iranske Mina Salehpour, er teaterets mest vågale og megalomane satsing denne våren. På Scene 2 blir det ein gyllen sjanse til å sjå denne syklusen av gamle drama spelt ut av eit framståande ensemble som gjennom fire månader har knadd og verkeleggjort heile det mytologiske forelegget til vår vestlege sivilisasjon.

- Det er som eit Game of Thrones møter greske tragediar på Scene 2!Les heile intervjuet med regissør Mina Salehpour.
Det byrjar med Teben

Antropolis er eit destillat av verka til antikkens store dramatikarar, ført i pennen av den tyske samtidsdramatikaren Roland Schimmelpfennig. Zevs bortføring av Europa leiar Katmos til å grunnlegge byen Teben. Derfrå skal vi følgje utviklinga av den vesle byen til å bli verdas hovudstad. Schimmelpfennig tek desse antikke mytane inn i ei notidig forteljing utan å kvitte seg med dei originale tekstane. Han byggjer Euripides, Sofokles og Aiskylos inn i ein ny tekst.

Oversyn over dei fem delane i Antropolis her.

Gudane er framleis med oss

Dei fem delane Dionysos, Laios, Ødipus, Iokaste og Antigone er eit djupdykk inn i mytanes verd, som igjen gir oss verktøya til å forstå rikdommen i gamle tragediar og deira relevans sjølv i dag. Antikken lever framleis – dei politiske bodskapa som blir formidla resonnerer med vår eiga tid. Det er ei brutal forteljing om brodermord, incest, maktkamp, ville festar og blodige slag. Også konfliktane i dei antikke legendene liknar forbausande mykje på dei vi strir med i det moderne samfunnet.

Premieresamtale

PREMIERESAMTALE ANTROPOLIS
LAURDAG 25. APRIL KL. 12.30
Før premieren på Antropolis av Roland Schimmelpfennig er det premieresamtale med regissør Mina Salehpour og teatersjef Kjersti Horn.