Suksessmusikalen Änglagård kjem til Noreg

Alt blir snudd på hovudet i den vesle bygda Yxared når den lokale einstøingen døyr, og den ukjende arvingen dukkar opp. Fanny (Ina Svenningdal) og kompisen Zac (Ken-Philippe Tete) dukkar opp på ein bråkete motorsykkel i ei sky av vegstøv. Ho er den ukjente arvingen til herregarden Änglagård. 

Fanny og Zac representerer alt det den noko trongsynte lokalbefolkinga ikkje er. Plutseleg blir den søvnige landsbyidyllen truga. I den solfylte svenske høgsommaren har folket rundt Änglagård fått noko nytt og spanande å snakke om.

Feelgood-musikal

Änglagård er blitt ein feelgood-musikal med ei humoristisk og rørande forteljing. Fordommar blir utfordra, relasjonar blir sette på prøve, og overraskande fellesskap veks fram der ein minst ventar det. Historia er basert på filmen av Colin Nutlety frå 1992, og musikken er skriven av hitmakaren Fredrik Kempe, som også har komponert musikken til musikalen Så som i himmelen. 

Suksess i Sverige

Musikalen Änglagård hadde urpremiere i Stockholm i 2023 og gjorde stor suksess. På Det Norske Teatret er det Ina Svenningdal og Ken-Philippe Tete som har hovodrollene. Svenningdal er kjend frå m.a. NRK-serien SKAM og fleire store musikalske roller på Det Norske Teatret, medan Tete gjekk ut frå Teaterhøgskolen i fjor og har vore ved Det Norske Teatret eit halvt år. Regien er ved Jakob Höglund og Sven Haraldsson har ansvar for scenografi.

Les meir

Fleire nye titlar

I dag legg Det Norske Teatret ut fleire nye titlar. Det blir revy i foajeen, ny roman av Jonas Hassen Khemiri på Hovudscenen, Frankenstein for barn og ei ny framsyning signert teaterrabulisten Tani Dibasey.

Søstrene

Jonas Hassen Khemiris roman blir sett i scene av Maren Bjørseth, og er ei storslegen forteljing om livet til Jonas og nabojentene - søstrene Ina, Evelyn og Anastasia. I løpet av tretti år blir liva deira vovne saman. Men det som knyter dei mest saman, er forbanninga som kviler over søstrene - ei forbanning som stammar frå ei anna tid og eit anna land: at alt dei elskar, vil dei òg miste.

Les meir

2002 ntoro yume

I framsyninga utforskar teaterregissørenTani Dibasey nostalgien som pregar unge i dag. Mange søkjer tryggleik i kultur frå tusenårsskiftet – musikk, film og teknologi – og lengtar etter ei tid dei sjølve ikkje opplevde. På scenen møter vi fem menneske som klamrar seg til fortida for å sleppe å forholde seg til ei utrygg samtid. Publikum får utdelt headset og må velge mellom tre lydspor, og må med det velje si eiga historie.

Les meir

Frankenstein

Feil Teater skal få boltre seg på Scene 3 i eit heilt år frå og med hausten 2026 og lage masse teater for barn. Første framsyning ut er Frankenstein - ein grøssar for modige barn og skvetne vaksne. Rotne hjernar, dødsdømde kjeltringar og grotesk vitskap blir sydd saman til ei historie om kva som gjer ein skapning til eit monster, og om å ville bli frykta når ein ikkje kan bli elska.

Les meir

Det har vore eit fantastisk år

På tampen av vårsesongen 2026 kallar gjengen bak Europavisjonar inn til årskonferanse i Kongsberg Gruppen i foajeen. Dette er ein crazy-komedie laga på berre tre veker, om eit av dei store paradoksa i fredsnasjonen Noreg: Vi tener pengar på krig. Her blir det revysongar, slapstick og rakettmissil. I tillegg til eksplosiv og treffsikker humor!

Les meir