Helse Vest heidrar prosjekt som løftar legeutdanninga

Prosjektet har utvikla ein enkel og forskingsbasert modell, som gir medisinstudentar i praksis tryggleik og auka læringsutbytte. Kjernen i modellen er «rettleiarfamiliar» – små grupper med LIS-legar og studentar som skaper relasjonar, ansvarskjensle og meistring utan ekstra ressursbruk.

– Prosjektet har stor overføringsverdi til andre kliniske spesialitetar og utdanningsløp. Det er særleg relevant for vidareutvikling av legeutdanninga i Helse Vest inkludert utvikling av Vestlandslegen på fire campus på Vestlandet. Målet til prisen er å løfte fram kor viktig god utdanning er, for helseføretaka, fagmiljøa og studentane, seier Hilde Brit Christiansen, direktør for medarbeidar, organisasjon og teknologi i Helse Vest.

Tiltaket har dokumenterte resultat, er publisert internasjonalt og vidareført ved Helse Fonna. Juryen framhevar kvaliteten, berekrafta og den store overføringsverdien for prosjektet til andre spesialitetar og den kommande Vestlandslegen-modellen.

Formålet med Helse Vest sin utdanningspris er å premiere tiltak som hevar og fremjar det faglege nivået på utdanning av helsepersonell i regionen, slik at helseføretaka er rusta til å møte framtidas utfordringar og behov.

Prisen blei delt ut på Utdanningskonferansen torsdag kveld, og vinnaren får 100 000 kroner til å utvikle utdanningstiltak vidare.

Les meir her: Krafta i relasjonar - Helse Vest RHF