NVE tilrår nye konsesjonsvilkår for Seljordsvatn

I 1944 ble det gitt løyve til å regulere vasstanden i Seljordsvatn under tidlegare lågaste vasstand, for å sikre vatn til Oterholt kraftverk. På bakgrunn av krav frå Seljord, Kviteseid og Tokke kommunar, har NVE handsama revisjon av konsesjonsvilkåra for reguleringa. Hovudformålet med ein vilkårsrevisjon er å betre natur- og miljøforholda gjennom tiltak som avbøter ulemper og negative verknader som reguleringa har medført. Reviderte konsesjonsvilkår avgjerast ved kongeleg resolusjon.

–Vi tilrår nye og moderne konsesjonsvilkår. Dette vil gjere det mogleg å stille krav om avbøtande tiltak som reduserer påverknaden på miljøet og naturen i og rundt vassdraget, og betre forholda for friluftslivet, seier Carsten Jensen, seksjonssjef i NVE. 

NVE vil endre bruken av luka 

NVE tilrår at luka i utløpet av Seljordsvatn skal stå open når vasstanden overstig kote 116,45. Dette vil etter NVE si meining gi noko lågare vasstand i ein del periodar, og dermed betre forholda for friluftslivet ved Seljordsvatn. Tiltaket vil ikkje påverke kraftproduksjonen i Oterholt kraftverk i nemneverdig grad. 

Vidare saksgang for vilkårsrevisjonen

No når NVE har sendt si innstilling til Energidepartementet (ED), vil departementet slutthandsame saka. Dersom nokon av partane har ny informasjon til innstillinga, kan dei sendast til ED på postmottak@ed.dep.no innan 6 veker. ED har tilgang på alle tidlegare dokument i saka, slik at det er berre nye informasjon som bør sendast inn.

Utviding av Oterholt kraftverk

Nedstrøms Seljordsvatnet planlegg Telemark Energi AS å utvide Oterholtfoss kraftverk ved å bygge ny vassveg med nytt inntak, ny kraftstasjon og auka vassuttak. NVE vurderer at tiltaket kan påverke livsvilkåra for anadrom fisk og elvemusling, og at dei skisserte planane derfor er eit konsesjonspliktig tiltak etter vassressurslova § 8.