Sara Khorami blir Sally Bowles i Cabaret

CABARET
med manus av Joe Masteroff, musikk av John Kander og songtekstar av Fred Ebb
PREMIERE 17. OKTOBER 2026
HOVUDSCENEN

Cabaret har sidan urpremieren i 1966 vunne seg ein plass som ein av dei mest populære musikalane gjennom tidene. Kombinasjonen av glamour, underhaldning og mørke politiske undertonar har fenga generasjonar av musikalgjengarar.

Handlinga går føre seg i Berlin på 30-talet, ei brytningstid der byen hadde ei forlokkande tiltrekkingskraft samstundes som nazismen fekk fotfeste. Kontrastane er store mellom det frigjorte kunstnarmiljøet og samfunnet elles. Til denne hovudstaden kjem amerikanaren Cliff Bradshaw. Den unge forfattaren blir straks dregen inn i byens heftige natteliv på Kit Kat Klub, og her møter og forelskar han seg i nattklubb-songerinna Sally Bowles (Sara Khorami). Rolla som Emcee blir spelt av Preben Hodneland.

Khoramis første musikalrolle

Det Norske Teatrets Sara Khorami er blitt kjent for eit nasjonalt publikum dei seinare åra gjennom ei rad film- og TV-produksjonar, som til dømes TV2-serien Heksejakt og filmen Full dekning. Ho har blitt heidra med både Amandapris og Gullruten. Men ikkje minst gjode ho eit uutsletteleg inntrykk på alle som fekk oppleve henne som Kristin Lavransdotter på Det Norske Teatret - ei rolle ho fekk Heddaprisen for Beste kvinnelege skodespelar for. For tida er ho aktuell i filmane Hvis ingen går i fella og Troll 2. På nyåret blir ho å sjå i nok ei hovudrolle med Kraken på kino. Men til hausten neste år, er det rolla som den dekadente og rå Sally Bowles i Cabaret som vil kreve alt fokus.

Debuterer som musikalregissør

Det er teatersjef Kjersti Horn som har regien, og saman med sin faste scenograf Sven Haraldsson og Patricia Svajer på maske- og kostymedesign skal ho ta oss med tilbake til 30-talets hippaste hovudstad. På scenen er det spent opp fleire storskjermar, og handlinga i musikalen vil spele seg ut i tidsriktige miljø som blir bygde på teateret. Det blir nære spelescenar som skal projiserast til lerretet, men også storslegne musikalnummer og sveitt nattklubbstemning, som koreograf Silas Henriksen har ansvaret for.