Går vidare med to byggeprosjekt i Helse Vest

– Det er ein krevjande økonomisk situasjon for helseføretaka i Helse Vest, og det er avgjerande at vi driv slik at vi kan prioritere byggjeprosjekta. Det er viktig både for utviklinga av tenesta, for pasientane i regionen og for medarbeidarane i sjukehusa, seier styreleiar i Helse Vest RHF, Agnes Landstad. 

– Vi er glade for at vi kan gå videre med både byggeprosjektet ved Stavanger universitetssjukehus og prosjektet for sikkerheitspsykiatri på Valen sjukehus. Vi har tett dialog med føretaka om dette. 

Styret i Helse Vest RHF gjorde vedtak i begge sakene på styremøtet 12. november 2025.  

Godkjenner forprosjektet til første fase av byggjetrinn 2 på Nye SUS 

Forprosjektet på Nye SUS gjeld eit nytt poliklinikk- og dagbehandlingsbygg på Ullandhaug. Prosjektet har ei styringsramme på 1459 millionar kroner (i 2025-verdi).  

E-bygget skal samle fleire fagområde på Ullandhaug, som nevrologi, øyre-nase-hals, onkologi og lungebehandling. Arbeidet med tomta er allereie i gang, og byggjeperioden er planlagd frå våren 2026 til 2029. Når bygget står ferdig, vil Helse Stavanger kunne samle poliklinisk aktivitet på Ullandhaug, redusere transportbehovet og leggje til rette for forsking og undervisning. I vedtaket om forprosjektet byggjetrinn 2 ved Nye Stavanger universitetssjukehus legg styret i Helse Vest RHF til grunn at det skal gjerast ei oppdatert vurdering av føretaket si økonomiske bereevne våren 2026. 

Denne helga flytter Helse Stavanger inn i dei fyrste bygga i det nye sjukehuset. 

• Sjå eiga nyheitssak om godkjenninga av forprosjektet for bygg E. 

• Sjå styresaka frå styremøtet i Helse Vest RHF 12. november. 

Ja til styrking av sikkerheitsposten på Valen 

I styremøte i Helse Vest RHF 12. november 2025 slutta også styret seg til at Helse Fonna går vidare i detaljplanlegging og bygging av scenario 2 ved Valen sjukehus. Scenario 2 skal dekkje det regionale perspektivet med 14 sengerom inkludert isolat, samt to skjermingseiningar. 

Den overordna planen for sikkerheitspsykiatri i Noreg viser at fleire blir dømde til tvungen psykisk helsevern. Derfor treng vi fleire sikkerheitsplassar både lokalt og regionalt. 

Helse Fonna ønsker å gå ut på anbod våren 2026 med byggestart hausten 2026 og ferdigstilling 2027. 

• Sjå eiga nyheitssak om forprosjektet for oppgradering av sikkerheitsposten. 

• Sjå styresaka frå styremøtet i Helse Vest RHF 12. november.