Kva for augeblikk formar liva våre?

JULEORATORIET
av Göran Tunström
PREMIERE LAURDAG 22. NOVEMBER KL. 18.00
HOVUDSCENEN

Juleoratoriet er ei forteljing om korleis hendingar kan forme menneske gjennom generasjonar, og korleis alle liva våre på sett og vis er fletta saman.

I framsyninga møter vi Aron Nordensson som mistar den høgt elska kona si, og seinare seg sjølv. Solveig Nordensson hadde ein draum om å oppføre Bachs juleoratorium i kyrkja i den vesle byen Sunne. Det skal gå tre generasjonar før denne draumen blir verkeleg. Aron, ektemannen, søker tilflukt i stilla. Sonen Sidner leitar etter kjærleik og samhald etter moras død, og må reise til den andre sida av jorda for å finne det. Først barnebarnet Victor blir i stand til å realisere bestemoras visjon om å oppføre det monumentale verket.

Nordisk Råds litteraturpris

Juleoratoriet fortel vakkert og sårt om sorg og kjærleik, og om musikkens heilande kraft. Romanen kom ut i 1983 og er blir sett på som eit av Göran Tunströms viktigaste verk. Den fekk Nordisk Råds litteraturpris i 1984 og blei filmatisert i 1996.

På Det Norske Teatret blir forteljinga om den ulykksalege familien eit lågmælt og meditativt verk fortald med svenske viser, jazz og klassiske songar som følgje, avrunda med Bachs juleoratorium.

Morten Svartveit

Morten Svartveit har rolla som Aron, mannen til Solveig Nordensson. Svartveit blei kjend for eit større publikum som karakteren Espen Eide gjennom NRK-serien Heimebane. Han har også mellom anna spelt rolla som Anders Knudsen i Viaplay-serien Okkupert, og var svogeren til Pørni. I fjor var han å sjå på filmlerretet som litt håplaus pappa i Victoria må dø. Han har vore fast tilsett ved Det Norske Teatret sidan 2019, og vore del av fleire framsyningar, mellom anna Bibelen. Han har også hatt større roller i musikkteaterframsyningane Woyzeck, Bienes historie og i musikalane Spelemann på taket, Sweeney Todd og Tenk om.

Oddgeir Thune

I rolla som sonen til Aron, Sidner, finn vi Oddgeir Thune, kjent frå ei rekke film- og TV-produksjonar dei seinare åra. Mellom anna har han vore ektemann i suksessfilmen Elskling, kjærasten til Pørni og naken fortidsmann i Beforeigners. Han har vore knytt til Det Norske Teatret sidan 2013, og tatt del i produksjonar som Andre verdskrigen, Tid for glede og hadde hovudrolla i Oresteia.

Kyrre Hellum 

Som Victor, barnebarnet til Aron og Solveig, og son til Sidner, finn vi Kyrre Hellum. Han er for mange alle mest kjent som den vonde Snerk i Julekongen på NRK. Han har elles vore med i ei rad TV-produksjonar, mellom andre i ei større rolle i TV-serien Black Widows. Han har også spelt i fleire filmar, der Den stygge stesøsteren og Full dekning er mellom dei nylegaste titlane. Han har vore knytt til Det Norske Teatret sidan 2012, og mellom anna vore del av produksjonane Bibelen, Oslo, Lehmantrilogien og Tid for glede.