Urpremiere: Forandre seg: metode av Édouard Louis

FORANDRE SEG: METODE
av Édouard Louis
URPREMIERE LAURDAG 18. OKTOBER KL. 15.00
SCENE 2

Regissør og teatersjef Kjersti Horn har late seg fascinere av forfattarskapen til Édouard Louis. Sjølv meiner ho at dette kanskje kan ha med å gjere at dei deler ei form for utanforskap. Louis voks opp i ein fattig, fransk småby der mellom anna hatet mot homofile stod sterkt. Han har brukt heile sitt vaksne liv på å flykte frå den han var, og skrive romanar om dette.
- Édouard har kjent på ei form for utanforskap. Mens min utanforskap er ein som eg ikkje kan flykte frå, seier Kjersti Horn.
Les heile artikkelen her.

I Forandre seg: metode tar forfattar Édouard Louis opp tråden frå den første romanen sin, Farvel til Eddy Bellegueule. Han reflekterer over livsprosjektet sitt med å skape seg om, å bli ein annan og å fjerne seg frå opphavet.

Kamera i dusjen

Kjersti Horn er også oppteken av korleis kamera og teater kan snakke saman. Gjennom ei rad framsyningar har ho testa ulike måtar dette kan gjerast på. No lar ho skodespelar Vetle Bergan framføre heile romanen Forandre seg: metode frå ein liten dusj bak scenen i kjellaren på teateret. Nokre meter unna, inne i salen på Scene 2, vil publikum sitte og få med seg det heile direkteoverført på ein skjerm.
- Eg opplever at kameraet opnar for høgare grad av teatralitet, har Kjersti Horn sagt i eit intervju tidlegare.
Les heile artikkelen her.

Ho meiner avgrensingane og motstanden rommet gir skodespelaren, er med på å understreke at det verkeleg er noko på spel:
- Sjølve rommet blir ein viktig del av det kunstnarlege uttrykket.

Kjersti Horn og Édouard Louis

Allereie same året som Édouard Louis kom ut med den sjølvbiografiske debutromanen Farvel til Eddy Bellegueule, tok regissør Kjersti Horn kontakt og spurde om ho kunne få lov til å lage teater av boka. Før året var gått, hadde den første dramatiseringa av ein Édouard Louis-roman hatt urpremiere, og dét på den svette uteplassen Jæger i Oslo. Sidan har Louis blitt for Noregs-venn å rekne, romanane hans har hausta glitrande kritikkar og det same har Horns iscenesetjingar av dei. Louis har gjesta både Litteraturhuset og Det Norske Teatret fleire gonger, sist som æresgjest under Den internasjonale Fossefestivalen no i haust. Kjersti Horn har hatt regien på urpremierene av i alt fire dramatiseringar av bøkene hans, og no er det klart for den femte.

Vetle Bergan 

Vetle Bergan er frå Lampeland i Buskerud, og var ferdig utdanna skodespelar frå Kunsthøgskolen i Oslo i 2016. Sidan var han nokre år knytt til Trøndelag Teater, før han kom til Det Norske Teatret i 2019. I vår var han del av den åtte timar lange produksjonen av Arven på Nationaltheatret, der han hadde rolla som Eric Glass. Denne blei han i våres nominert til Heddaprisen for beste skodespelar/hovudrolle for. I Forandre seg: metode er det han som står aleine i dusjen gjennom heile framsyninga og framfører Édouard Louis sin tekst.
Les meir om Vetle Bergan.