Ny direktør for digitalisering i Helse Vest RHF

– Eg er svært glad og nøgd med at Ørjan Andersen går inn i denne stillinga. Digitalisering er eit viktig område for oss i Helse Vest, og Ørjan har solid erfaring med seg inn i dette arbeidet. Eg ser fram til samarbeidet, seier Inger Cathrine Bryne, administrerande direktør i Helse Vest RHF.

Andersen kjem frå stillinga som avdelingsleiar for tenesteutvikling i Helse Vest IKT, og har over 14 års erfaring der. Tidlegare har han arbeidd, mellom anna, i PwC og i Helse Bergen.

Av utdanning har han hovudfag i informasjonsvitskap frå Universitetet i Bergen, og har gjennomført det nasjonale toppleiarprogrammet for spesialisthelsetenesta. Han er opphavleg frå Sogndal og bur i Bergen.

– Eg ser verkeleg fram til å ta fatt på oppgåvene og bidra til arbeidet med digitalisering i tenesta. Dette er eit område eg brenn for, og eg gler meg til å samarbeide med dyktige kollegaer både i heile Helse Vest og nasjonalt, seier Ørjan Andersen.

Ørjan Andersen byrjer i stillinga 1. oktober 2025.

Direktør for digitalisering har ei sentral rolle i å realisere strategien for digitalisering i Helse Vest. Målet er å utvikle brukarvennlege og effektive digitale løysingar, som bidreg til god kvalitet i tenestene og ein god arbeidskvardag for medarbeidarane.