Europavisjonar - musikk og politikk

På Det Norske Teatrets Hovudscene stig Eurovision-feberen. Frå 1. mars blir det finale kvar kveld. Finalistane er statsleiarar frå heile Europa gjennom dei siste 35 åra, som syng sine visjonar til Eurovision-tonar.

EUROPAVISJONAR
av Simen Formo Hay, Johan Hveem Maurud og Oda Radoor
URPREMIERE 1. MARS KL. 17.30
PÅ HOVUDSCENEN

Vi startar med Berlinmurens fall i 1989, da tanken om eit sameint Europa for alvor blei ein realitet. Demokrati og liberale verdiar skulle spreie seg til heile kontinentet som eit kollektivt gode, og ideologiane blei erklærte døde. I Europavisjonar ser vi nærmare på korleis det gjekk, når finalistane syng sine visjonar for Europa gjennom hits frå Eurovision i same tidsperiode. Kven som har den beste visjonen, er det publikum som avgjer.

EI LITA OPPSUMMERING FRÅ 1989 TIL I DAG HER.

Paljettar og politikk

Eurovision-nerd Simen Formo Hay har saman med Oda Radoor og Johan Hveem Maurud fått oppfylt draumen om å arrangere Eurovision i det som både blir ei blanding av ein teaterkonsert, politisk satire og ei fjernsynssending. Programleiarar, kommentator, floormanager og kamerafolk er på plass under "sendinga". I green room går det føre seg politisk småkjekling, posisjonering, drikking og flørting. På scenen vil 18 songsterke aktørar framføre storslagne, velregisserte og paljettglinsande nummer heilt i tråd med sjangeren.

Cårejånni Enderud har kostymeansvaret, og vil sørge for at Eurovision-vibbane når til bakerste rad. Enderud har ei lang merittliste, også frå Grand Prix, både her heime og i dei internasjonale finalane.

SNIK-KIKK PÅ PRØVANE HER.

Konkurransen går føre seg mellom ulike mektige personar og statsleiarar frå Europas nyare historie, som Jens Stoltenberg, Angela Merkel, Tony Blair og Silvio Berlusconi. Alle har som formål å overtyde publikum om at deira visjon bør vinne. Men det blir drama i greenroom, og utfallet av konkurransen er på ingen måte gitt på førehand.

Frå håp til håpløyse

- Vi lever jo i ei tid med opprusting og store politiske spenningar i Europa, seier regissør Simen Formo Hay.
Han har tidlegare regissert Døden på Oslo S. på Økernsenteret med stor suksess. Med Europavisjonar vil han forsøke å gi publikum ei forståing av vår felles nyare historie, og samtidig reflektere over kvifor vi er gått frå glasnost og håp til opprusting og framtidspessimisme.
LES HEILE INTERVJUET HER.

Politikk og ESC-hits

Europavisjonar vil også få gjesteopptredenar frå politiske aktørar på verdskartet som er med på å påverke retninga Europa tar. I denne politiske satiren vil vi få eit gjensyn med politiske storheiter, men også dei som kanskje har gått i gløymeboka. Kven hugsar til dømes finansminister Yannis Varoufakis, som gjekk på tiggerferd Europa rundt etter finanskrisa som slo økonomien i Hellas ut? Europavisjonar er ein effektiv og glitrande historietime for alle som treng å forstå kvifor det politiske kartet i Europa ser ut som det gjer i dag. Det blir gøy, lærerikt, fengjande, provoserande – og forhåpentlegvis samlande. Europa treng oss no!