Anita Traa blir konstituert som dagleg leiar for BIR Voss Hardanger

Anita har lang erfaring frå både offentleg og privat sektor. Ho har vore ein del av BIR Voss Hardanger sidan 2015, og kjem frå rolla som leiar for kunde og kommunikasjon. Før det arbeidde ho i 25 år som resepsjons- og bookingsjef ved Park Hotell, og ho har òg erfaring som sakshandsamar i Voss herad.

– Eg er både stolt og audmjuk over å ta på meg denne rolla. Det er eit stort ansvar, men eg går inn i det med hjartet på rett plass og stor respekt for det viktige arbeidet vi gjer i lag, seier Anita.

Gjennom ti år i BIR Voss Hardanger har ho vore innom ei rekke funksjonar i organisasjonen – frå hushaldningsrenovasjon og næring, til digitalisering, kundeservice og hytterenovasjon. Ho trekkjer fram breidda i erfaringa som ein styrke inn i den nye rolla:

– Eg kjenner organisasjonen godt, og har fått eit nært forhold til både kollegaer og innbyggjarar. Eg ser fram til å bidra til vidare utvikling og gode tenester for regionen vår.

Konsernsjef i BIR, Borghild Lekve, er godt nøgd med valet:

– Eg er glad for at Anita har takka ja til å leie BIR Voss Hardanger i denne perioden. Ho har solid erfaring og eit sterkt engasjement, og eg er trygg på at ho vil vere eit viktig bidrag til både det lokale selskapet og konsernleiinga.

For lokal forankring og framtidsretta arbeid

Anita er fødd og oppvaksen på Voss, bur på Bulken med mann og har tre born, og er glad i naturen og fjellet. 

– Eg gledar meg til tida framover, og er trygg på at vi saman skal få til mykje bra!