Mot ei grønare helseteneste

No er Spesialisthelsetenesta sin rapport for samfunnsansvar for 2024 klar. Rapporten framhevar framsteg innanfor miljøvennleg drift og berekraftige tiltak i spesialisthelsetenesta. Dette er den sjuande rapporten i rekkja, og for første gong er den heildigital.

Store steg

Rapporten gir fleire gode døme på arbeidet med samfunnsansvar som skjer i sjukehus og helseføretak i landet, og det kjem godt fram at det er mange miljømedvitne medarbeidarar i sjukehusa med initiativ og tankar om korleis vi saman kan ta kloke val i vegen vidare.

Døme på dette er tiltaksbanken som Helse Førde har arbeidd fram, med forslag til miljøtiltak dei ulike avdelingane i sjukehusa kan gjere. Tiltaksbanken har fått stor merksemd, blir teke i bruk nasjonalt og er gjord tilgjengeleg for alle sjukehus.

Spesialisthelsetenesta skal vere leiande i arbeidet med miljø og berekraft, og har eit stort ansvar når det gjeld å forvalte ressursar på ein berekraftig måte.

Rapporten viser korleis spesialisthelsetenesta har teke store steg for å redusere unødig forbruk, spesielt bruken av eingongsutstyr. Dette tiltaket bidreg til å redusere avfallsmengda og fremje bruk av fleirgongsutstyr, som ofte er av betre kvalitet og kan vaskast, reparerast og brukast igjen.

Klimarekneskap

Administrerande direktør Inger Cathrine Bryne i Helse Vest RHF understrekar viktigheita av miljøvennleg drift og berekraftige løysingar.

– Dette er ein viktig og god rapport som alle burde lese. Eg er imponert over arbeidet som er gjort. Det viktigaste er likevel at det gode arbeidet med å redusere tenesta sitt klimaavtrykk held fram og blir forsterka, seier Bryne.

For andre gong presenterer rapporten ein fullstendig klimarekneskap som dekkjer både direkte og indirekte utslepp. Dette inkluderer utslepp frå gassar og forbruk av olje og energi, og estimert utslepp frå innkjøp av varer og tenester.

Spesialisthelsetenesta har eit mål om 40 prosent reduksjon av utslepp innan 2030, klimarekneskapen viser at sidan 2019 har tenesta totalt redusert med 11 prosent. Når kjøp av gjenvinningskraft er trekt frå er reduksjonen heile 37 prosent sidan 2019.

Dei regionale helseføretaka har sett ambisiøse mål for framtida, inkludert å redusere forbruket av usterile hanskar og eingongsvarmejakker. Desse tiltaka er ein del av ein breiare strategi for å sikre berekraftig drift og fremje sosial rettferd i helse- og omsorgstenesta.