Bypakke Nord-Jæren: Forlenger bypakken slik at fleire prosjekt kan bli gjennomført

Samferdselsdepartementet la i dag fram eit forslag for Stortinget om å forlenge innkrevjingsperioden for Bypakke Nord-Jæren med vel fem år. Bypakken gjeld i kommunane Stavanger, Sandnes, Sola og Randaberg. Der ein del av byvekstavtalen for Nord-Jæren, samla omtalt som Bymiljøpakken. Nullvekstmålet for persontransport med bil er det overordna målet for denne pakken.

Det er lokalpolitisk semje om å opne opp for at det kan bli innført miljødifferensierte takstar i Bypakke Nord-Jæren på eit seinare tidspunkt. Regjeringa foreslår derfor å opne for innføring av differensierte takstar i bypakken. Dette kan tas i bruk seinare om det kjem lokalpolitiske vedtak om dette og må skje innanfor den vedtekne gjennomsnittstaksten.

Forventa utgifter og inntekter i balanse

Det er kostnadsauke i fleire prosjekt i porteføljen til bypakken. I fleire rundar er det gjort kostnadskutt på prosjekter og potensialet for ytterlegare kutt har vore vurdert. Rogaland fylkeskommune og dei aktuelle kommunane har derfor gjort vedtak om å forlenge innkrevjingsperioden for å kunne realisere fleire prosjekt.

– Med ein forlengd innkrevjingsperiode på fem år, kjem forventa inntekter og utgifter i balanse. Ytterlegare kostnadsauke eller svikt i inntektene vil bety at prosjekt må skalerast ned eller avlysast, i tråd med prinsippa i porteføljestyringa. Det vil ikkje vere aktuelt med ytterlegare utvidingar av innkrevjingsperioden for å dekkje eventuell kostnadsauke. Framover må det vere sterk kontroll med kostnadene, seier Nygård.

I prosjektporteføljen inngår mellom anna riksvegprosjekta E39 Smiene–Harestad og E39 Figgjo–Ålgård. Desse er lagt i Statens vegvesens planportefølje etter Stortingets handsaming av Nasjonal transportplan 2025–2036. Det er lagt opp til at begge prosjekta delvis skal finansierast med bompengar frå Bypakke Nord-Jæren.

Det blir lagt opp til å vidareføre gjeldande takst-, rabatt- og innkrevjingssystem i dei 38 bomstasjonane i Bypakke Nord-Jæren. Gjennomsnittstaksten blir òg vidareført. Ei forlenging av innkrevjingsperioden med vel fem år vil auke brutto inntekter til pakken med om lag 5,6 milliardar kroner.

Samanslåing av tilskot i belønningsordninga for betre kollektivtransport

I framlegget orienterer også Samferdselsdepartementet om at det vert opna for meir fleksibilitet i bruken av tilskotsmidlar, gjennom at dagens øyremerking av tilskot til reduserte billettprisar på kollektivtrafikk vert fjerna frå og med 2025 for nye belønningsavtalar. Tilskotet vil i staden inngå som ein del av belønningsmidlane, slik at det berre vil vere ei tilskotsordning.

Dette er i tråd med Nasjonal transportplan 2025–2036, der det er det lagt til grunn  mindre øyremerking og meir lokal fridom i bruken av dei statlege midlane for å få ein meir treffsikker verkemiddelbruk og betre måloppnåing i byområda.

Endringa gir auka handlingsrom lokalt for å vurdere kvar for nokre tiltak som er naudsynt for å nå nullvekstmålet. Samstundes er det ikkje til hinder for å framleis bruke midlane til lågare prisar på kollektivtrafikk, viss det bidreg til å nullvekstmålet på ein effektiv måte, seier samferdselsministeren.

Sjå også: Prop. 92 S (2024 – 2025) – Forlengd innkrevjingsperiode for Bypakke Nord-Jæren i Rogaland og samanslåing av tilskot i belønningsordninga for betre kollektivtransport mv. i byområda