Stor milepæl for Noregs største samferdselsprosjekt i nyare tid

Strekninga Arna-Stanghelle er ein viktig del av hovudferdselsåra mellom Bergen og Oslo og bind landet saman frå vest til aust.

– Med fellesprosjektet Arna-Stanghelle skal vi styrkje trafikktryggleiken, skape føreseieleg transport og gi både folk og næringsliv eit betre transporttilbod med reduserte reisetider og auka kapasitet på både veg og bane, seier samferdselsminister Jon-Ivar Nygård.

Bygginga av ny E16 og Vossebane på den 30 km lange strekninga Arna–Stanghelle er eit fellesprosjekt mellom Statens vegvesen og Bane NOR.

– Dagens E16 og Vossebana mellom Arna og Stanghelle er prega av låg standard, uføresette stengingar, skredutsette strekk og tunnelar med behov for vedlikehald og oppgradering. Derfor har dette vore eit viktig prosjekt for regjeringa å setje i gang. seier samferdselsministeren.

Det største samferdselsprosjektet i nyare tid

Med nesten 80 kilometer veg- og jernbanetunnelar blir Arna–Stanghelle det største tunnelprosjektet i Noreg. Mellom Arna og Trengereid blir det firefelts veg, og tofelts veg vidare mot Stanghelle. Det blir dobbeltspor på heile strekninga på den nye jernbanen.  

– Arna–Stanghelle det største samferdselsprosjektet i nyare tid her til lands, med ein forventa kostnad på 41,2 milliardar kroner og ein antatt opning av veg og jernbane rundt 2038. Det er større enn megaprosjekta Follobanen i Oslo-området og E39 Rogfast i Rogaland. Men det er ikkje viktig i seg sjølv at prosjektet er det største. Vi byggjer Arna–Stanghelle fordi det er nødvendig, seier Nygård.

Høgt prioritert av regjeringa

Regjeringa har tatt grep for å kunne gå i gang med fellesprosjektet så raskt som mogleg, mellom anna med prioritering i statsbudsjettet for i år. 

Den største rådgjevingsavtala nokon gong i Noreg er allereie lyst ut, i tillegg til kontrakt for oppstart av berg- og skredsikring, som er ein del av det førebuande arbeidet. Før sommaren startar sikring av prosjektstrekninga, med blant anna spyling av skredutsette område.

Kontraktssignering og byggestart for sjølve prosjektet med nye tunnelar for veg og bane, tverrslag og fjellhallar, føreset vedtak i Stortinget om kostnadsramme og delvis bompengefinansiering.

Økonomiske rammer og finansiering

Overfor Stortinget har regjeringa foreslått ei kostnadsramme på 49,3 milliardar kroner for fellesprosjektet Arna-Stanghelle. Styringsramma, den forventa kostnaden, er på 41,2 milliardar kroner.

Finansieringa er basert på statlege midlar og bompengar, der dei statlege midlane utgjer om lag 90 prosent. Jernbanedelen utgjer 52 prosent og vegdelen 48 prosent av dei samla kostnadene.

For fleire opplysningar – sjå:

• Prop. 97 S (2024–2025) Utbygging og finansiering av Fellesprosjektet Arna–Stanghelle i Vestland og kostnadsramme for E45 Kløfta i Finnmark
• Statens vegvesens nettside om fellesprosjektet Arna–Stanghelle