Styrka samarbeid bidrar til kortare ventetider

I tråd med regjeringas Ventetidsløfte har Helse Vest sett i verk fleire tiltak for å korte ned ventetidene. Eitt av tiltaka har vore å få eit tettare og betre samarbeid mellom helseføretaka og avtalespesialistane. Hensikten er å rute pasientane til behandling på riktig nivå. Dei pasientane som ikkje treng behandling på eit sjukehus, bør få den hos ein avtalespesialist. På den måten blir køen hos sjukehusa kortare, og dei som berre kan behandlast der, vil få raskare hjelp.

Gode resultat for ØNH og auge

Hausten 2024 har helseføretaka i Helse Vest, saman med avtalespesialistane og Praktiserende Spesialisters Landsforening (PSL), revidert samarbeidsavtalane innan faga øyre, nase, hals (ØNH) og auge. Det har vore møte i Stavanger, Bergen, Haugesund og Førde. Å forbetre samarbeidet på denne måten har gitt gode resultat.

– Det er gledeleg å sjå at dette arbeidet har gitt resultat. No ønskjer vi å bruke dei gode erfaringane frå ØNH og auge, og gjere tilsvarande på andre store fagområde for å få same effekt der, seier Bjørn Egil Vikse, fagdirektør i Helse Vest RHF. 

Helse Vest ønsker å revidere samarbeidsavtalane mellom avtalespesialistane og helseføretaka innan alle fag, og neste ut er lunge og hjarte/kar der planen er å gjennomføre møter før påske.

Avtalespesialistane har også ventelister

I samarbeidsmøta har dei blant anna blitt einige om korleis helseføretaket kan overføre pasientar til avtalespesialistar som har kapasitet til å ta imot dei.

– Avtalespesialistane  jobbar effektivt, men har sjølv ventelister og dermed begrensa kapasitet til å hjelpe til med pasientar som ventar i helseføretaka, seier Vikse.

Pasientar overført frå helseføretak til avtalespesialist 01.11.24-18.12.24

Øyre, nase, hals
Helse Bergen	235
Helse Stavanger	40
Helse Fonna	11
Helse Førde	9
Sum	295
Auge
Helse Bergen	0
Helse Stavanger	27
Helse Fonna	148
Helse Førde	0
Sum	175

Denne oversikta visar kor  mange pasientar helseføretaka overførte frå sine ventelister til avtalespesialist fram til jul i fjor haust.

Andre tiltak for å ta ned ventetidene

Helse Vest har hatt særleg merksemd på dei varige tiltaka for å korte ned ventetidene. I tillegg til samarbeidet med avtalespesialistane, inkluderer dette godt prioriteringsarbeid, å digitalisere prosessar for å avlaste klinikarane, stabil og føreseieleg drift i dei kliniske einingane, høg kvalitet i ventelister, gode kunnskapsgrunnlag og regionale rapportar, og arbeid med oppgåvedeling.

FAKTABOKS:

Samarbeidsavtalar med avtalespesialistar

Samarbeidsavtalane mellom helseføretaka og avtalespesialistane er ulike, men dei handlar i stort om mellom anna:

• kva typar oppgåver knytte til utgreiing og behandling som skal gjennomførast hos avtalespesialist
• pasientflyt
• utveksling av informasjon om kapasitet, fråvær, felles prosedyrar og kliniske retningslinjer

I haustens møter blei det bedt om at helseføretaka og avtalespesialistane innanfor  fagområda ØNH-sjukdomar og augesjukdomar har samarbeidsmøte 2-4 gonger i året.

Helse Vest har avtale med om lag 230 avtalespesialistar i regionen. Særskilt for faga øyre-nase-hals sjukdommar (ØNH), augesjukdommar, psykisk helsevern og kvinnesjukdommar utgjer avtalespesialistane ein stor del av tilbodet i regionen.