Medietilsynet: færre regelbrot, men fleire sanksjonar i fjor

Medietilsynet gjennomførte 33 tilsynsaktivitetar i fjor, om lag på nivå med året før. Medietilsynet fører tilsyn med kringkastingsregelverket, bildeprogramlova og reglane for mediestøtte. Tal på sanksjonar i form av gebyr eller åtvaring auka frå seks i 2023 til ni i 2024. 

Det blei gitt tre gebyr som følge av brot på kringkastingslova i fjor. Dette gjaldt saker der det enten var klare regelbrot eller gjentatte brot på same føresegn. Dei aktørane som fekk gebyr, er Discovery, NRK og Radio Midtfylket. Dei seks åtvaringane kom etter fem brot på kringkastingslova og eitt på bildeprogramlova.  

– Vi legg vekt på informasjon og rettleiing i tilsynsarbeidet og har god dialog med aktørane om regelverket. Nokon gonger tilseier alvoret i regelbrotet likevel at vi må reagere med åtvaring eller gebyr, seier direktør i Medietilsynet, Mari Velsand. 

Reglar skal beskytte publikum 

I 2024 var dei fleste tilsynsaktivitetane knytte til korleis tilbydarane følger reglane om reklame, sponsing og produktplassering.  

– Formålet med desse reglane er blant anna å beskytte publikum mot for stort kommersielt trykk og gjere dei merksame når dei blir utsette for kommersielle bodskap, seier Velsand. 

Medietilsynet har faste kontrollar med korleis reglane for reklame, sponsing og produktplassering blir følgde opp knytt til nylanseringar av ulike tv-programseriar kvar vår og haust. I 2024 viste vårkontrollen at det var færre brot enn tidlegare, noko som gjorde at Medietilsynet nedskalerte kontrollen noko på hausten. 

Rettleiing om aldersgrenser 

Etter ei lovendring set distributørane nå sjølve aldersgrenser på kinofilmar, mens Medietilsynet fører tilsyn ved mistanke om feil aldersgrense.  

I 2024 blei det ført tilsyn med elleve kinofilmar. I tre tilfelle vurderte Medietilsynet at aldersgrensa på filmen var i strid med retningslinjene, og i eitt av tilfella fekk distributøren åtvaring. Medietilsynet gav rettleiing i 27 saker, og i alle tilfella blei Medietilsynets vurdering følgd. 

Heile Tilsynsrapporten 2024 finn du her. 

Fakta om Medietilsynets tilsynsaktivitetar i 2024

• Det blei gjennomført 33 tilsynsaktivitetar: 20 tilsyn etter kringkastingsregelverket, 11 etter bildeprogramlova og kontroll med 2 aktørar som fekk produksjonstilskott.
• Det blei gitt fem åtvaringar og tre gebyr for brot på kringkastingsregelverket.
• Ofte blir fleire program og fleire aktørar kontrollerte i eitt og same tilsynet. Resultatet kan vere at reglane i all hovudsak er følgde i majoriteten av programma eller hos dei fleste aktørane, sjølv om eit tilsyn avdekker brot.
• Det primære verktøyet for Medietilsynet for å sikre at reglane blir følgde, er dialog og rettleiing. Dersom aktørar bryt regelverket fleire gonger, dersom det er grove brot, eller dersom aktørane ikkje viser vilje til å gjere endringar når Medietilsynet påpeikar brot, kan Medietilsynet gi åtvaring, gebyr eller tvangsmulkt.