Kvedarkvintetten presenterer første singel frå nytt album

LYTT HER

Tagal er å tie stille, vera taus eller ordlaus, og verket utfordrar rammene for vokalmusikk ved at tekstelementa er så godt som fråværande. Verket er komponert av Jorun Marie Rypdal Kvernberg og vart urframført under Førdefestivalen i 2021. Om lag fire år etter kjem plata ut på Grappa musikkforlag med Martin Langlie som produsent. 

Kvelarspringar er ein omfattande komposisjon, der Kvernberg har teke utgangspunkt i den tradisjonelle norske tretaktsdansen springar. Danserytma vert skapt gjennom eit puslespel av songmotiv som saman utgjer ein suggererande springar. Kvelarspringar tek lyttaren med frå desse fragmenterte, asymmetriske rytmepartia opp i heftig og samstemt tralling, over til eit flytande landskap med drømmande vokal. Alt dette resulterer i ein komposisjon som verkeleg lever opp til namnet sitt.

Jorun Marie Rypdal Kvernberg fortel:

“Kvelarspringaren er sterkt inspirert av tradisjonsmusikken ein finn på hardingfela. Sett ein ein finger over to strengar samstundes kallar ein det på hardingfelespråket for eit kvelartak. Dette begrepet synest eg er både brutalt, frekt og humoristisk på same tid, og dette har vore utgangspunktet for å lage ein springar som både lener seg mot tradisjonen samstundes som den freidig røsker i sjanger-rammene.“

I 2020 vart vi kontakta av Jorun Marie Rypdal Kvernberg med spørsmål om vi var interesserte i eit verk komponert til oss som kvintett, noko som sjølvsagt var veldig stas.” – fortel Kvedarkvintetten og utdjuper vidare:

“Fram til dette samarbeidet har materialet vårt hatt sitt utspring i songtradisjonen i Hallingdal, med nesten utelukkande tradisjonelt stoff, som vi har arrangert i vår eigen stil. Det å skulle tileigne seg materiale spesialkomponert til Kvedarkvintetten var både utfordrande og gav oss ny inspirasjon. Jorun Marie gav oss verket i noteform og lydopptak. Vi las og lytta, og forma det til vårt uttrykk med tralleord og rytmikk, frasering og stil. Då vi skulle spele inn Tagal, ynskte vi å vidareutvikle verket ved å gjere det meir til vårt eige og tilføre nye element. Martin Langlie kom inn i prosjektet med originale idear og brei erfaring, og samarbeidet med han var inspirerande og utviklande for oss som gruppe.“

Kvedarkvintetten er:

Silje Risdal Liahagen (vokal)

Tonje Risdal Liahagen (vokal)

Sina Myhr (vokal)

Margit Myhr (vokal)

Helga Myhr (vokal)