Vøringsfossen med nytt anlegg Fossatromma, opnar 18. september

Vøringsfossen er kanskje den mest kjende fossen i landet. Her stuper store vassmengder 182 meter frå Hardangerviddeplatået ned i Måbødalen. Etter å ha utvikla destinasjonen Vøringsfossen med to tidlegare utbyggingsetappar, kompletterer Statens vegvesen i år attraksjonen med eit stort parkeringsanlegg med elbil-lading, offentleg toalett, utsiktspunkt og landskapsarbeid på Fossatromma.

Besøkjande vil med dette kunne oppleve Vøringsfossen og Måbødalen frå nye perspektiv, og det nedre platået på Fossatromma blir nå tilgjengeleg frå det øvre området ved Fossli via den spektakulære trappebrua over elva Bjoreio og den gamle kløvvegen.

I 2009 vann arkitekt Carl Viggo Hølmebakk ein designkonkurranse for Vøringsfossen. I 2015 vart første fase i utbygginga byrja på Fossli med stiar, toalett, parkering og fleire utsiktspunkt mot fossen og dalen.

Andre etappe med den internasjonalt omtalte trappebrua over fossen mellom Fossli og Fossatromma vart opna i 2020. Den tredje etappen med tilrettelegginga av Fossatromma får no altså ei offisiell opning i september 2024.

Heile anlegget består dermed av over ein kilometer sikra sti, fleire spektakulære utsiktspunkt, store og små bruer, to servicehus, samt romslege parkeringsplassar, der den eine tilbyr lading for elbilar.

Opning, onsdag 18. september 2024, kl. 12.00

Program:

• Musikkinnslag v/gruppa «Bakartaus»

• Velkomen v/Per Ritzler, Nasjonale turistvegar, Statens vegvesen

• Arkitekturen v/ Carl Viggo Hølmebakk, Hølmebakk Øymo

• Byggjeprosessen v/ Kjersti Wold, Driv Prosjektstyring

• Silje Myhre Amundsen, leiar Nasjonale turistvegar, Statens vegvesen

• Byggjeprosessen v/ Ola Ulvolden, Brun Bygg

• Reiselivet v/ Marit Stadheim, Visit Eidfjord

• Opning v/ Timo Knoch, ordførar i Eidfjord kommune

• Servering v/Fløy bakeri

Arkitekt: Hølmebakk Øymo /Entreprenørar: Mesta AS og Brun Bygg AS /  Byggherre: Statens vegvesen

 

Gjennom 30 år har Statens vegvesen tilrettelagt atten utvalde naturskjøne strekningar langs fjell, foss, kyst og fjord. Nyskapande arkitektur i form av rasteplassar, utsiktsramper og servicebygg saman med tankevekkjande kunst inspirerer og begeistrar vegfarande frå både inn- og utland. Tilrettelegginga av attraksjonen Nasjonale turistvegar bidrar til verdiskaping i reiselivsnæringa i tråd med føremålet med satsinga.