Tredje og siste del av Øyonn Groven Myhrens HAUGTUSSA i kvedardrakt.

Tekst av Arne Garborg 

Musikk av Øyonn Groven Myhren

Øyonn Groven Myhren – song (kveding), kraviklyrer, basslangeleik, seljefløyte 
Rasmus Kjorstad – fele, langeleik, oktavfele, munnharpe, hardingfele
Tomas Nilsson – gongar, tromme, cymbal, runerasle, bjeller, klokkespel, vibrafon

«Di lenger ein kjem ut i Veslemøy-forteljinga, di meir dramatisk er ho», seier Øyonn Groven Myhren. «I siste delen dukkar det opp eit troll – Gumle den gamle, ei blid heks, og talrike lokkande vesen som vil dra Veslemøy bort frå den verkelege verda. På andre sida finn vi Veslemøys døde søster med gode råd. Og til slutt syner “visdoms volve” seg. Det har vore spennande å dikte musikk til alt dette.»

Høyr HAUGTUSSA Vol. III HER

Den komplette fysiske utgåva som blei sluppe 21. april 2023 og som inneheld heile den nesten to timar lange trilogien, har hausta mange lovord. Vi siterer:

Nettavisen 20/7: For en åpenbaring det har blitt … «Haugtussa» i Øyonn Groven Myhrens tolkning har blitt et tidløst storverk - intet mindre (terningkast 6)

Klassekampen 12/5: Det har blitt et særegent og imponerende musikkdrama (terningkast 5)

Audophile.no 28/5: Og når resultatet har så høy kvalitet på både komposisjon og fremførelse blir dette uhyre verdifullt(terningkast 5)

Øyonn Groven Myhrens Haugtussa-trilogi inneheld 34 spor med ei samla speletid på 1 time og 47 minutt, utan samanlikning det mest omfattande musikalske arbeidet som er gjort over Garborgs folkekjære diktforteljing frå 1895. Den fysiske utgåva kom 21. april 2023 med all musikken spreidd utover tre CDar, og i tillegg eit 52-siders hefte med songtekster, engelske resyme og etterord om tekstutval og komposisjon. CD-utgjevinga er å kjøpe direkte frå Grappa musikkforlag og frå Platekompaniet.

Øyonn Groven Myhren er mellom våre fremste folkemusikarar. I tillegg til å kvede, spelar ho seljefløyte, Kraviklyre og basslangeleik, og ho lagar ny musikk i små og store format. Ho har vore sentral mykje, blant anna i kvedargruppa Dvergmål som har gitt ut albuma Visor og kvæde frå Blåberglandet (1996) og Song i himmelsalar (2004), det første Spellemann-nominert. Albumet Nordjordet (2018) er frukt av eit mangeårig samarbeid med Bugge Wesseltoft. Her nemnast òg I Jolo (1998) med Eilert M. Hægeland og Alf Tveit, Paa Jorden Fred og Glæde med Lars Henrik Johansen (2018), Runarslaget (2021) med SISU slagverksensemble og Tìle (2022) med Sidiki Camara og Olav Torget. Øyonn Groven Myhren kjem frå ei ætt av balladesongarer og Grisilla i Gullveven (2008) er vigd mellomalder-balladen. I mellomalder-modus finn vi òg CDane Harpa (1997) og Wizlavs viser (2018) med ensemblet Aurora Borealis, og Så vide fara dei lindarord (2017) med duoen Sogesong, det siste Spellemann-nominert. Med kvartetten Barokk Boreal har ho retta søkelys mot 1600-talsmusikken i Noreg med Ti bud i sanger (2020) og Sanger om død og glæde (2022). Og ho var den første til å sleppe eit album tilegna slåttetralling: Akkedoria frå Kristiania (2003). Øyonn Groven Myhren har mottatt prisar som Sagaprisen og Norsk folkemusikkfonds folkemusikkpris i 1997 og Rolf Gammelengs ærespris for utøvande kunstnarar i 2022. I tillegg har ho fleire førsteprisar frå Landskappleiken. I 2001 komponerte Øyonn Groven Myhren og Odd Nordstoga eit timelangt verk over Aslaug Vaas diktsyklus Nivelkinn frå 1934. Urpremiera kom på CD (2001), og fekk Spellemannprisen i kategorien Folkemusikk/Gammaldans i 2002. I desse dagar emnar ho på ein eikvinnes kvedar-opera over fornkvedet Vǫluspá, med planlagt urpremiere i november 2024.01.05