Blått svev - Hildegun Riise les dikt av Jon Fosse til nykomponert musikk

I 2019 fyller Jon Fosse seksti år. Det er også tjuefem år sidan han debuterte som dramatikar og trettiseks år sidan han debuterte med romanen Raudt, svart i 1983. I jubileumsåret vert diktarskapen hans heidra både i inn- og utland. Jon Fosse skriv innanfor eit breitt spekter av sjangrar; romanar, teaterstykke, dikt, barnebøker, essay og kortprosa. Likevel er det som om alt heng saman på sitt eige, finstemte vis.

Jon Fosse skriv om fjorden, døden og kjærleiken. Den kvardagslege verda som blir dikta fram, er det berre Fosse, med sin særeigne signatur, som kan skapa. For over den finst ein stor himmel, og i alt han skriv, er det sterke band til det vestlandske.

Likevel ber litteraturen hans i seg ei menneskeleg sanning som viser seg å vera gyldig i store delar av verda.

Tekstutvalet til denne utgjevinga er det Hildegun Riise som står for. Ho har valt dikt som lenge har vore som skattar for henne, men òg tekstar som har festa seg i henne gjennom denne innspelinga; dikt som er fylte med kjærleik og lys, einsemd, død og trøyst. Med andre ord dikt som set ord på noko djupt universelt og menneskeleg.

Jon Fosse er ein unik diktar som gjev oss språk for det så å seia språklause. Hardingfelespelar og komponist Benedicte Maurseth og gitarist og komponist Stein Urheim er ansvarlege for nye musikalske tolkingar og komposisjonar til Fosses poesi.

Alle tre har òg tidlegare arbeidd med hans mangslungne tekstunivers.

Utgjevinga vert lansert med framsyningar på Det Norske Teatret, Fossedagane og Litteraturhuset i Bergen.

Framsyningar:

17. September – Det Norske Teatret Scene 2, Oslo

18. September – Det Norske Teatret Scene 2, Oslo

21. September – Fossedagane, Strandebarm

26. September – Litteraturhuset, Bergen