Den beste lokalmaten heidra på Matstreif

Prim og Huldreost frå Avdem Gardysteri, Laks frå Salma og Fjellgris frå Stølsvidda vart heidra med Spesialitet-merket. Kva for mat- og drikkevarer som kjem gjennom nålauget blir bestemt av ein uavhengig fagjury leia av fylkesmann Lars Sponheim. Fagjuryen vurderer grundig kvalitet og smak før dei tildeler Spesialitet.

-  For oss matglade er det flott at vi har ei merkeordning som synleggjer den beste lokalmaten i Noreg. Spesialitet-merket viser fram kvaliteten og handverket bak produkta, og bidreg til å auke lønsemda for produsenten. Merket blir delt ut til produkt som har ein unik smak og ei historie som gjer dei til noko spesielt, sa landbruks- og matministeren.

-  Det er viktig at forbrukarane finn fram til norske matspesialitetar. Skal vi nå målet om å omsetje lokal mat- og drikke for 10 milliardar, ja då treng ein vegvisarar som Spesialitet-merket, seier adm. dir.  Nina Sundqvist i Matmerk.

Prim og Huldreost frå Avdem Gardsysteri

Huldreost er ein brunost etter eiga oppskrift utvikla av Avdem Gardysteri, og er ein spennande variant av norsk tradisjonell brunost med unik smaksoppleving. Prim frå Avdem er ein klassisk handlaga prim, med ekte og naturleg smak og konsistens. Matspesialitetane er begge basert på råvarer frå eigen gard.

Fjellgris frå Valdres frå Stølsvidda

Fjellgrisen lever eit fritt liv 1000 meter over havet. Ved å gå i fjellet utviklar grisen store musklar. Den veks saktare enn innegris, og blir ofte slakta seinare enn andre grisar. Grisen får spesialfôr, og et både gras, lyng og einer på fjellet. Kombinasjonen gir eit ekstra smakfullt og mørt kjøt. Fagjuryen konkluderte med at kjøtet hadde topp kvalitet og var saftig med nydeleg smak.

Laks frå Salma

SALMA baserer seg på mykje handverk. Fisken må gjennom ein manuell utveljingsprosess og kvar filet blir skjært ut for hand.  Alle ledd av produksjonen går føre seg i Bømlo, frå utklekking av rogn til ferdig produkt i butikken. Dei brukar også ein helt eigenarta slaktemetode: «Kald-fisk»-metoden.