Løyve til Bentsjord kraftverk

Bentsjord kraft AS har søkt om løyve til å byggje Bentsjord kraftverk i Bentsjordelva i Storfjord kommune. Kraftverket er planlagt med ei installert effekt på 3,1 MW og vil med dei fastsette vilkåra gje ein årleg produksjon på omlag 5,8 GWh.

Utbygginga vil nytte ei fallhøgd på 426 meter og endre naturleg vassføring på ei 1500 meter lang elvestrekning. Vatnet skal førast i nedgravne røyr mellom inntak og kraftstasjon.

Tiltaket ligger i eit urørt og intakt naturområde. Det er påvist ein raudlista fugleart i skogen langs elva. Anleggsvegen vert sperra med bom for å hindre hogst. Det er ikkje særlege friluftsinteresser knytt til influensområdet. NVE meiner at med tilstrekkeleg minstevassføring heile året, og god planlegging og oppfølging av anlegget i byggetida, vil skadeverknadane for landskap og miljø vere akseptable.

NVE vurderer at fordelane av tiltaket i høve til dei ålmenne og private interessene er større enn skadane og ulempene ved å bygge kraftverket, og gjev difor løyve til Bentsjord  kraftverk på fastsette vilkår.

Kontaktpersonar
Seksjonssjef Øystein Grundt, tlf. 22 95 93 89, mobil 901 98 216.
Seniorrådgjevar Inger Staubo, tlf. 22 95 98 27