Statens vegvesen vurderer å anmelda farleg hærverk

– Dette er ikkje berre ulovleg, men også direkte farleg, seier byggeleiar Jørn Kristian Engebø om det Statens vegvesen no opplever på riksveg 5 Gravensteinsgata i Sogndal sentrum.

Spesielt i helgene

Det er spesielt i helgene at Statens vegvesen opplever hærverk på det store arbeidet som vert gjort på ei 600 meter lang vegstrekning.

Det er ein grunn til at skilta er sett opp slik dei er, og det er for at me skal få ei forsvarleg og  heilskapleg trafikkavvikling i anleggsperioden, understrekar Engebø.

- Statens vegvesen har sperra av ein god del av anleggsområda fysisk, men kan ikkje stenga av alt. Det skuldast at me mellom anna har varetransport. No må me kanskje stenga av meir enn me alt har gjort. Gåande må uansett respektera skilt og sperringar, og ikkje ta seg inn på anleggsområde. Det er uforsvarleg, det me ser.

Vurderer å anmelda

Statens vegvesen opplever og at skilt med påskriften "fortau stengt" vert fjerna. I tillegg skjer det at byggjerde blir fjerna (funne igjen på andre sida av sentrum) og øydelagde.

Statens vegvesen har alt teke kontakt med høgskulen og vidaregåande, slik at skuleleiinga og lærarar understreker alvoret overfor studentar og elevar.

- Me veit ikkje kven som står bak, men må berre på det sterkaste oppmoda om at dette tek slutt umiddelbart. Viss ikkje vil me vurdera å anmelda tilhøva, seier Engebø.