Skal forske på ulikskap i europeiske utdanningssystem

Forskarar ved Høgskulen på Vestlandet (HVL) og Universitetet i Bergen (UiB) skal forske på ulikskap innanfor læring hos barn og unge i eit komparativt perspektiv. Prosjektet skal munne ut i råd til korleis skape meir inkluderande oppvekstkår.

- I Noreg er vi vane med å tenkje på oss sjølve som eit veldig egalitært samfunn der alle har like sjansar i livet, men ulikskapen er også ei utfordring her. Kanskje er det til og med vanskelegare å kjempe mot den her til lands, sidan den er mindre innlysande enn andre plassar. Vi har lett for å undervurdere dei sosiale, kulturelle og økonomiske forskjellane som faktisk finst, trur professor Solvejg Jobst ved HVL.

Ni europeiske land deltek

Forskningsprosjektet PIONEERED ser etter nyskapande praksisar i utdanningssystemet og utdanningspolitikken som motverkar reproduksjon av sosial ulikskap.

Målet er å fremme likare kår for barn og unge på alle nivå av utdanningssystemet i Europa: sikre at dei får ei rettferdig deltaking i utdanninga si i barnehagane, skulevesenet så vel som i meir uformelle læringsarenaer.

Forskingsprosjektet har 13 partnarar frå ni land. Det er finansiert av EUs forsknings- og innovasjonsprogram Horisont 2020, som har tildelt 3,5 millionar euro. Prosjektet startar i 2021 og varer i tre år.

- Barn og unge kjem frå forskjellige heimar og boområde, og går på skular som er kjenneteikna av forskjellige lærings- og handlingsmiljø. Dette betyr at dei er i ulike sosioøkonomiske eller kulturelle livskontekstar, og dermed er det ikkje like lett for alle å prestere på same nivå på skulen, seier professor Jan Skrobanek, sosiolog ved UiB.

Les meir om prosjektet

Nettside for prosjektet