Prognose for årets mediestøtte: Lokalavisene ligg an til å få 30 millionar kroner meir enn i fjor

Prognosen viser at nesten 215 millionar kroner av årets pott på 358 millionar kroner kan gå til dei ti største tilskottsmottakarane (sjå tabell). Ifølgje prognosen ser lokalavisene ut til å få 30 millionar kroner meir i år enn i fjor. Fleire av dei små avisene kan auke tilskottet med opp mot 70 prosent.

Usikker prognose på grunn av nye søkjarar

Elleve nye aviser har søkt om produksjonstilskott i år. Prognosen for tildelinga er laga før det er tatt stilling til om nye aviser kjem inn i ordninga.

– Vi er i gang med å vurdere nye søkarar, men dette tar litt tid. Prognosen tar derfor utgangspunkt i eksisterande tilskottsmottakarar, men tar ikkje høgde for eventuelle nye. Vidare har Medietilsynet i prognosen lagt til grunn at søkarar som oppfylte kriteria for å få tilskott i 2019, også oppfyller kriteria i 2020, seier Velsand.

Fiskeribladet ligg an til å få stor auke

Fiskeribladet ser ut til å få den største auken i kroner, med over seks millionar kroner meir enn i fjor. Hovudårsaka til auken er at avisa har endra abonnementsproduktet sitt, slik at tilskottet skal bereknast for eitt produkt (komplett) i staden for separate produkt (papiravis og nettavis).

125 av totalt 150 aviser kan få auka tilskott som følge av auken i årets tilskottspott, ifølge prognosen. Auken i tilskottet til Fiskeribladet og ei svakare opplagsutvikling samanlikna med andre aviser i ordninga er årsaka til at fleire av dei største avisene ligg an til å få mindre i tilskott i år enn i fjor.

Dei ti avisene som ifølge prognosen får mest i tilskott i 2020 (prognosen tar ikkje omsyn til moglege nye aviser):

Avis	Prognose 2020	Tilskott 2019
Klassekampen	43 170 944	42 177 500
Bergensavisen	37 226 637	35 083 878
Vårt Land	32 068 580	33 081 582
Dagsavisen	28 671 237	29 734 383
Nationen	21 688 205	21 868 778
Dagbladet Dagen	15 781 023	15 392 136
Fiskeribladet	12 904 515	6 688 937
Morgenbladet	9 739 462	10 411 634
iTromsø	8 026 374	8 335 814
Dag og Tid	5 444 284	5 099 077
Totalt for dei ti største	214 721 261	207 873 719

Nye aviser kan påverke fordelinga dersom dei kvalifiserer

Elleve nye aviser har søkt om å komme inn i ordninga for produksjonstilskott i 2020, blant dei Dagbladet Pluss (eit digitalt abonnementsprodukt frå Dagbladet) og Nett.no (lokal nettavis på Sunnmøre). Dei to publikasjonane søkte også om støtte i fjor, men fekk då avslag. Det er klaga på begge avslaga, og klagene er for tida til behandling i Medieklagenemnda. Blant dei nye søkjarane er det elles både digitale, lokale aviser og nisjepublikasjonar, som Computerworld og Medier24. Kva for aviser som kvalifiserer til å komme inn i ordninga, blir klart først over sommaren. Det blir ikkje utarbeidd prognosar for nye aviser som søker om å komme inn i tilskottsordninga i 2020.

– Dersom fleire nye aviser viser seg å kvalifisere til støtte, kan dette få stor betydning for støttenivået for andre aviser, blant anna dei større nummer to-media. Dersom dei kvalifiserer, kan dei nye søkarane totalt komme til å få støtte tilsvarande opptil ti prosent av årets ramme på 358 millionar kroner, seier Velsand.

Vanlegvis avgjer Medietilsynet kva for publikasjonar som kvalifiserer for støtte, og betaler ut endeleg oppgjer i oktober/november.

Se oversikten over årets prognose her (pdf-fil)

Se oversikten over årets prognose her (excel-fil)

Fakta om produksjonstilskottet

• Produksjonstilskottet skal bidra til eit mangfald av nyheits- og aktualitetsmedium over heile landet.
• Tilskottsordninga er spesielt retta mot medium i marknader som er for små til å vere berekraftige, og som er alternativ til dei leiande media i større marknader.
• Ordninga likestiller papiropplag og digitalt opplag.

Les meir om produksjonstilskottet her