Pris for å løfte portørfaget

Dei får prisen for å ha etablert ein god yrkesfagleg praksisarena for portørfaget, gjennom eit strukturert og godt samarbeid mellom sjukehus og vidaregåande skule.

- Allsidig yrke

Portøryrket handla tidlegare mest om tunge løft og køyring av døde, men i dag har ein portør mange og varierte oppgåver.

I tillegg til å ta godt vare på pasientane og frakte dei mellom avdelingar på sjukehuset, må ein portør ha kunnskap om lager og logistikk, kjeldesortering, sortering av tøy, smittevern, brannslukking, hjarte- og lungeredning, løfteteknikk og etikk. For å nemne noko.

For 20 år sidan fekk nye portørar fem dagar med opplæring. I dag er utdanninga to år på vidaregåande skule og læretid.

– Det er eit kjekt og veldig allsidig yrke. Vi er litt potet, og får vere med på alt, seier opplæringsansvarleg Leif Moen på Stavanger universitetssjukehus. Han er ein av dei som i ei årrekkje har arbeida for å løfte portørfaget.

Modell for andre utdanningar

Utdanningsprisen blei delt ut i samband med styremøte i Helse Vest onsdag 9. desember. I grunngjevinga legg juryen vekt på at engasjementet og yrkesstoltheita som blir vist i prosjektet bidrar til utvikling og forbetring av kvalitet i utdanninga. Dei meiner modellen kan overførast til andre yrkesfaglege utdanningar.

– Prosjektet er viktig for portøryrket, men kan også vere rekrutteringsplattform til andre helseprofesjonsutdanningar som Helse Vest treng for å kunne ivareta mange oppgåver i ei helseteneste i endring, heiter det frå juryen.

Om utdanningsprisen

Utdanningsprisen blir gitt til grupper, team eller klinikkar som ved ulike initiativ eller tiltak har gjennomført ein innsats av stor betyding for utdanning i verksemder i føretaksgruppa i Helse Vest.

Prisen er på 100.000 kroner, eit diplom og eit kunstverk.