Marknaden for pengespelreklame på norske tv-skjermar held fram med å falle, og sank med fire prosent første halvår i år frå same periode i 2021. Tala, som er utarbeidd av Nielsen Media Research for Medietilsynet, vart framlagte under Arendalsuka. Der arrangerte Medietilsynet og Lotteritilsynet eit seminar om tv-reklame for pengespel.  

Gjennomført tilsyn med Discovery 

Måndag tok også Discovery Medietilsynets pålegg til distributørane om å fjerne reklame for utanlandske pengespel, til følgje. Stansen er ifølge Discovery midlertidig, inntil dei nye reglane i kringkastingslova er rettsleg prøva.  

Dei aktuelle Discovery-kanalane FEM, MAX, VOX og Eurosport Norge bleikontrollerte av Medietilsynet denne veka.  

– Vi fant ingen brot, og den utanlandske reklamen ser ut til å vere fjerna. No ligg mykje til rette for at også dei lovlege aktørane bør kunne dempe marknadsføringa, sa Medietilsynets direktør, Mari Velsand, på arrangementet i Arendal.

Norsk Tipping lovar endring  

Norsk Tipping er den største av dei lovlege aktørane. Dei lovar endring i deira marknadsføring på tv.  

– No må vi sjå kva som er tilstrekkeleg for oss. Norsk Tipping kjem til å jobbe med tiltak som reduserer kor synlege dei meir aggressive spela er, der dei som slit med pengespel gjerne spelar, sa Tonje Sagstuen, kommunikasjonsdirektør i Norsk Tipping, på arrangementet i Arendal. 

Les om dei siste tala utviklinga i pengespelmarknaden her. 

Fakta om pengespelreklame som er forboden etter norsk lov 

• Etter pengespellovgivinga, som Lotteri- og stiftelsestilsynet forvaltar, er det forbode å marknadsførepengespel som ikkje har løyve i Noreg. 
• Frå 1. januar 2021 kom det ein ny regel i kringkastingslova som gjer det mogleg for Medietilsynet å pålegge norske distributørar å hindre eller vanskeleggjere tilgangen til å marknadsføre pengespel som er i strid med norsk rett på tv og i audiovisuelle bestillingstenester. 
• Medietilsynet kan berre gi pålegg om å hindre pengespelreklame dersom det er mogleg – avtalemessig eller teknisk – å hindre eller vanskeleggjere tilgangen til marknadsføringa, og dersom eit pålegg er tenleg. 
• Medietilsynet påla tidlegare i vår tv-distributørane Telenor, Telia, Altibox, RiksTV og Allente å stoppe marknadsføringa av pengespela Unibet, Betsson, Nordicbet og Betsafe på Discoverys tv-kanalar FEM, MAX, VOX og Eurosport Norge. 
• Discovery har mellombels stoppa sendingane sine av reklame og sponsoridentifikasjonar frå utanlandske pengespel frå 15. august etter vedtak i Medietilsynet. Discovery meiner Medietilsynets vedtak mot dei fem norske tv-distributørane strir mot EØS-retten, og har gått til sak mot staten ved Kultur- og likestillingsdepartementet. Reklamane og sponsoridentifikasjonane er stansa mellombels i påvente av utfallet av den komande rettssaka.