Løyve til Faurefjellet vindkraftverk og avslag til Holmafjellet vindkraftverk

Hybrid Technology AS er tiltakshavar på Faurefjellet vindkraftverk, som vil gje omlag 180 GWh ny kraftproduksjon per år, noko som svarar til straumbruken til 9000 husstandar.

NVE legg vekt på at det er gode vindforhold i planområdet og at området er godt eigna for vindkraftproduksjon. Utbygging av vindkraftverket vil gje eit viktig bidrag til å oppfylle politiske målsetjingar om auka satsing på fornybar kraftproduksjon i Noreg.

Zephyr AS er tiltakshavar til Holmafjellet vindkraftverk. I avslaget har NVE lagt vekt på negative verknader for kringliggande bustadar i form av visuelle verknader, støy og skuggekast over eller tett opp mot anbefalte grenseverdiar. Holmafjellet vindkraftverk vil samstundes forsterke dei samla negative verknadene av vindkraftverk i heile regionen.

I handsaminga av søknadene har NVE vurdert fordelane ved ny fornybar kraftproduksjon opp mot ulempene tiltaka fører med seg. NVE meiner dei viktigaste negative verknadene er knytt til støy, visuelle verknader og reduksjon av kystlynghei, som er i god hevd. 

Det var søkt om samordna nettilknyting for dei to vindkraftverka. Denne fell bort som fylgje av avslaget til Holmafjellet. NVE understrekar at løyvet til Faurefjellet vindkraftverk set vilkår om akseptabel nettilknyting til Måkaknuten transformatorstasjon og eigen søknad for dette.

NVE registrerer at Bjerkreim kommune er positiv til Faurefjellet vindkraftverk og fylkeskommunen stiller seg positiv til begge  prosjekta. Kommunene Gjesdal og Bjerkreim stiller seg negative til Holmafjellet vindkraftverk.

Fylkesmannen i Rogaland har fremja motsegn til begge prosjekta. Årsaken er ei samla vurdering av verknadane for viktige landskaps-, natur- og friluftsverdiar. Avgjersla om å gje løyve til Faurefjellet vil difor bli sendt til Olje- og energidepartementet for klagehandsaming etter at klagefristen har gått ut.

Les meir om Faurefjellet vindkraftverk.

Les meir om Holmafjellet vindkraftverk.

Kontaktpersonar:
Avdelingsdirektør Rune Flatby, tlf: 41 67 82 03
Sakshandsamar Hilde Aass (Faurefjellet vindkraftverk), tlf: 22 95 98 85
Sakshandsamar Marte Nyheim (Holmafjellet vindkraftverk ), tlf: 22 95 90 38