Jernbanen 2.0: Digitalisering kan gi fleire avgangar, færre forseinkingar og betre reiseinformasjon

Samferdselsdepartementet har gitt Jernbanedirektoratet i oppdrag å gjennomføre konseptvalutgreiingar (KVU) om høvesvis betre utnytting av det signalsystemet ERTMS og innføring av nytt mobilkommunikasjonssystem. 

Betre utnytting av ERTMS – automatisk togframføring
Heile den norske jernbanen skal på midten av 2030-talet vere utstyrt med det nye, digitale signalsystemet ERTMS – European Rail Traffic Management System. Dette skal mellom anna gi færre forseinkingar og innstillingar, tettare togtrafikk og betre kundeinformasjon.

I samband med dette skal Jernbanedirektoratet gjennomføre ei konseptvalutgreiing om betre utnytting av jernbaneinfrastrukturen som følje av ERTMS-utbygginga. Utreiinga skal òg vurdera moglegheitene for automatisk togframføring i kombinasjon med ERTMS.

Konseptvalutgreiing om nytt mobilkommunikasjonssystem
FRMCS er ein ny standard for neste generasjon mobilkommunikasjonssystem for jernbane og erstattar dagens system – GSM-R. I løpet av dei neste ti åra kjem ikkje leverandøren lenger til å gi systemstøtte til GSM-R. Noreg må difor ta i bruk den nye standarden, som er under utarbeiding i EU. I samband med dette skal Jernbanedirektoratet gjennomføre ei konseptvalutgreiing.

Direktoratet skal mellom anna sjå på kva for konseptuelle løysingar som er best eigna for å dekkje det heilskaplege kommunikasjonsbehovet for den digitaliserte jernbanen. KVU-en skal òg belyse om det er mogleg å utnytte dei digitale systema betre, slik at det blir mogleg å hente ut positive effektar i form av til dømes raskare togframføring, auka kapasitet, mindre energibruk og betre reiseinformasjon i sanntid. I samband med dette skal direktoratet òg vurdere ulike aspekt ved tryggleiken på jernbanen.  

Utgreiing om responsmiljø for handtering av uønskte digitale hendingar
Regjeringa er oppteken av å oppretthalde eit høgt tryggleiksnivå på alle samfunnsområde, og vil styrkje evna til å handtere uønskte digitale hendingar i transportsektoren. Behova er knytte til handtering, koordinering og informasjonsdeling. Sektorvise responsmiljø i transportsektoren skal bidra til å dekkje dette behovet.

Eit slikt responsmiljø skal etablerast for handtering av digitale hendingar i jernbane- og kollektivsektoren. Jernbanedirektoratet skal vurdere ulike modellar for korleis eit slikt responsmiljø kan organiserast.

Vidare framdrift
Konseptvalutgreiingane om høvesvis ERTMS og automatisk togframføring og nytt mobilkommunikasjonssystem har leveringsfrist i midten av september 2023. Rapporten om organisering av responsmiljø mot uønskte hendingar skal vere ferdig innan 15. november i år.   

 

For fleire opplysningar – sjå:

• Supplerande tildelingsbrev nr. 3 av 4. april 2022 frå Samferdselsdepartementet til Jernbanedirektoratet