HAUGTUSSA i kvedardrakt

Release: 21. april, 2023 

Tekst av Arne Garborg 
Musikk av Øyonn Groven Myhren 
 
Øyonn Groven Myhren – song, seljefløyte, kraviklyrer, basslangeleik 
Rasmus Kjorstad – langeleik, munnharpe, hardingfele, fele, oktavfele 
Tomas Nilsson – hakkebrett, klokkespel, vibrafon, ‘blåhauginstrument’ 

Høyr HAUGTUSSA forteljing i songar Vol. I her: https://orcd.co/haugtussa

«Då Folkemusikkveka på Åli Hallingdal i 2019 tinga ny musikk til Haugtussa, visste eg med ein gong at eg ville kvede forteljinga, for Garborg nyttar sjølv ord som kvad og song om verket sitt», seier Øyonn Groven Myhren. «Eg tenkte først å kvede forteljinga utan instrumentfølgje, men ettersom arbeidet voks, ville eg ha innslag av seljefløyte, klimpring, felespel og slagverk. For i Garborgs tekst finst både fløyte, harpelåt, langeleik, stillare strengir, fele-ljom, springar, sylvklokke-kling, bjøllur, ringlig, bummel, bammel, gryte og kjelsom læt ein lått, som ingen visste, og meir til. Eg var heldig å få ja frå musikarane Rasmus Kjorstad og Tomas Nilsson, og då hadde eg alt dette å boltre meg i.» 

I Haugtussa følgjer vi tenåringsjenta Veslemøy som er synsk og kan sjå både huldrefolk, troll, hekser og dei som er døde. Vi møter henne heime på garden og som gjetarjente i fjellet der ho blir kjærast med Jon. Då Jon svik henne, tar sorg og nedbrytande krefter overhand. På motsett side står Veslemøys døde søster som ei klok og varm rettleiar. Vi følgjer Veslemøys kamp i striden mellom lys og mørker, og til slutt syner «visdoms volve» seg. 

Skiftinga mellom årstidene spelar ei viktig rolle i forteljinga, og utgjevinga er delt inn i tre årstidsbolkar: Vol. 1: vinter, Vol. 2: vår og sumar, og Vol. 3: haust og vinter. Vol. 1 kjem ut digitalt samstundes med den fysiske utgåva, medan digitale lanseringar av Vol. 2 og Vol. 3 kjem seinare, på to ulike tidspunkt.

Velkommen til plateslepp på Riksscenen 23. april!