Kulturrådet gir 4,9 millionar til 21 kulturnæringsaktørar

Støtteordninga har som føremål å styrke kulturnæringsaktørar gjennom ulike former for samlokalisering og nettverk. Det kom inn 85 søknader til søknadsfristen. Om lag 25 prosent av søkjarane fekk støtte på mellom 100 000 og 425 000 kroner, til saman 4,9 millionar.

- Det var ei vanskeleg prioritering mellom mange gode søknader, seier seniorrådgjevar Per Olav Torgnesskar i Kulturrådet. - Dette er det andre året vi lyser ut midlar til kulturnæringar, og det er tydeleg at kunnskapen om kva ein kan søkje om på ordninga har blitt større.

Her finn du ei oversikt over alle prosjekta som har fått støtte

Næringshagar og fashionhub

Prosjekta som har fått støtte femnar vidt og blant mottakarane finn vi eit motenettverk i Oslo, ei mentorordning for kunstnarar i Telemark og eit filmverft i Tromsø.

Nettverket Spillmakerlauget i Bergen fekk 425 000 kroner i støtte for å utvikle eit nasjonalt kompetansesenter for spelutvikling. Målet er at kompetansesenteret skal vere ein ressurs for næringa og dermed løfte ho opp til eit berekraftig nivå.

For etablerte verksemder kan det å samlokaliserast krevje omfattande prosessar. Som i fjor vert det derfor også i år gjeve tilskot til nokre forprosjekt og utgreiingar. Til dømes fekk eit samarbeid mellom Kongsberg Jazzfestival, Glogerakademiet/Glogerfestivalen og Energimølla kr 300 000 til utvikling av felles kompetanse og tenester i forkant av samlokalisering av dei tre organisasjonane.

- Så lenge slike prosessar er godt tenkte og dokumenterte vil dei også ha overføringsverdi til andre aktørar i same ærend. Vi forventar at desse prosjekta vil gi oss relevant kunnskap knytt til samlokalisering, by- og stadsutvikling, og dialog med offentlege myndigheiter og private eigedomsutviklarar, seier Per Olav Torgnesskar.

Har henta inn ekspertvurdering

Fagadministrasjonen i Kulturrådet har vurdert søknadene og henta inn eksperthjelp der det har vore nødvendig, bl.a. frå Norsk filminstitutt, Sametinget og Innovasjon Noreg. Ein har særleg lagt vekt på overføringsverdi, breidde i finansieringa og at tilskotet skal finansiere konkrete aktivitetar i ein avgrensa tidsperiode.

- Kulturnæringsordninga skal bidra til større økonomisk bærekraft. Det er difor eit poeng at prosjekta signaliserer vilje og evne til å hente finansiering frå ulike kjelder, seier Torgnesskar.

21 prosjekt i ni fylke

Dei 21 prosjekta som fekk støtte høyrer heime i ni ulike fylke: Oppland (2), Buskerud (2), Hordaland (2), Rogaland (2), Troms (2), Oslo (8), Sør-Trøndelag, Telemark og Østfold (alle 1). Fem av prosjekta har heile landet som arbeidsområde. I tillegg til Kulturrådets vanlege ansvarsfelt som kunst og kulturvern, vart det også gjeve støtte til prosjekt innanfor dataspel, mote og film.

Her finn du ei oversikt over alle prosjekta som har fått støtte

Les om handlingsplanen for kulturnæringar

Kontaktperson

Per Olav Torgnesskar, tlf. 98656865