Teknologi kan gjere jordarbeidinga meir presis

Effektivisert jordarbeiding var eit viktig tema under teknologidagen, med faglege innlegg og praktiske demonstrasjonar i felt.

Jorda er sjølve grunnlaget for planteproduksjonen vår, men aukande nedbør stiller større krav til jordstrukturen. Ifølgje NIBIO-forskar Till Seehusen kan mindre og grunnare jordarbeiding bidra til å bevare jordstrukturen og redusere faren for erosjon. Det kan også styrkje den biologiske aktiviteten i jorda og redusere dieselforbruket. Studier viser at mindre intensiv jordarbeiding kan redusere dieselforbruket med 30–80 prosent.

Behovet for jordarbeiding varierer likevel innanfor same jordet, mellom anna på grunn av ulik jordtype, topografi, ugras og jordpakking. Ved å kombinere jordkart, avlingskart, dronemålingar og bonden sine eigne erfaringar kan ein tilpasse jordarbeidinga til behova på ulike område.

– Å setje i verk rett tiltak på rett område, og til rett tid, er sjølve kjernen i presisjonslandbruket, seier Seehusen.

Under teknologidagen demonstrerte David Nicolay Eik og Even Kristian Mangerud frå Felleskjøpet ei moderne harv som regulerer kor intensivt jorda skal arbeidast, basert på ei tildelingsfil. Demonstrasjonen var den første opne framvisinga av denne teknologien i Noreg. Deltakarane fekk også følgje med på dieselforbruket på ulike delar av jordet.

Seehusen understrekar at det ikkje er nødvendig med dyr teknologi for å arbeide meir optimalt. Bøndene kan også gjere enkle tiltak basert på kunnskap om eiga jord.

Denne pressemeldingen er basert på en artikkel publisert på NIBIO.no. Medier kan fritt benytte både innholdet i pressemeldingen og tilhørende bilder mot kreditering av fotograf og henvisning til NIBIO.