No kan kven som helst få innblikk i nasjonal landbruksøkonomi

Bak datagrunnlaget ligg eit omfattande statistikkarbeid utført av Budsjettnemnda for jordbruket (BFJ). NIBIO har vore sekretariat for nemnda sidan ho blei oppretta i 1948, og forvaltar datamaterialet.

– Me har lenge ønska å laga ein meir moderne og brukarvenleg presentasjon av økonomien i norsk landbruk. I sommar fekk me inn to masterstudentar som har vore med å utvikla eit dashbord med viktige hovudtal, fortel Hanne Margrete Johnsen, seniorrådgjevar for landbruksøkonomi i NIBIO.

Dashbordet gjer det enklare å sjå dei store linjene i utviklinga av norsk landbruksøkonomi. Mellom anna viser tala at innkjøpt fôr er ein stor utgiftspost. I 2025 gjekk 26 prosent av kostnadane i norsk landbruk til fôr, totalt 11,6 milliardar kroner.

– Me håper at dette kan hjelpa studentar, journalistar, politikarar og alle andre som er interesserte, til å få eit betre innblikk i korleis det går med økonomien i norsk landbruk, seier Johnsen.

Det interaktive dashbordet har fem hovudtema: inntektsutvikling, inntektsfordeling, kostnadsfordeling, ei detaljert oversikt over inntekter og utgifter og ei samanlikning av rekneskap og budsjett for dei siste åra.

Dashbordet er tilgjengeleg på NIBIO sine nettsider. NIBIO ønskjer tilbakemeldingar og forslag til forbetringar, og vil arbeida for å gjera meir av talmaterialet tilgjengeleg på denne måten i framtida.

Denne pressemeldingen er basert på en artikkel publisert på NIBIO.no. Medier kan fritt benytte både innholdet i pressemeldingen og tilhørende bilder mot kreditering av fotograf og henvisning til NIBIO.